Trabou preparatorio pa Watty Vos Boulevard a cuminsa cu hopi critica

ORANJESTAD – Hopi tabata e critica cu a keda lansa diasabra mainta den direccion di DOW ora cu a tuma nota di e kapmento di mata banda di caminda diripiente riba e caminda (banda di e.o. Kooyman y ex Texas). A resulta cu e rosamento tabata programa caba, como parti di e trabou preparatorio pa e proyecto di Watty Vos Boulevard. Como cu e informacion no a keda presenta prome, e trabounan a bin como sorpresa pa hopi, ocasionando e criticanan severo riba e caso aki. Despues di algun rato, e anuncio nan a cuminsa aparece, splicando e motibo di e rosamento di e terenonan.

MOTIBO DI ROSAMENTO

Ora cu e portal aki a busca informacion mas aleu, a bin resulta cu loke a tuma lugar segun DOW, tabata e parti di trabounan preparatorio cu tin cu sosode pa construccion di Ring Weg 3 Watty Vos Blvd cu a cuminsa. A mustra tambe cu tin un plan ‘in place’ pa compensa e naturalesa cu matanan local full riba e ruta. Esey no ta kita afo cu e criticanan a sigui, mirando cu e ta haci dolor mira matanan wordo gekap. Segun informacionnan tabata bisa ‘nos kier mira Watapana y Kibrahacha y Wayaca y Kwihi bin na nan lugar.

E PROYECTO

E proyecto, conoci como ringweg, cu ta un caminda cu ta pasa rond di Oranjestad pa facilita e trafico cu na e momentonan aki ta congestiona,- a wordo anuncia mitar di luna di maart, informando cu e mester a cuminsa 2 siman despues. Por lo menos segun prome minister Mike Eman a anuncia e siman ey. Pero esaki a dura mas y a haci e ground breaking despues. E siman aki a cuminsa cu e trabou preparatorio. Segun e prome mandatario, na varios ocasion a splica cu e conexion entre aeropuerto y e zona hotelero, mirando cu haf di carga pa Barcadera a keda cla, t’asina importante cu e caminda mester cana paralelo cu esun di Green Corridor cu ta yega te San Nicolas. Intencion di e conexion aki ta cu esnan cu ta bahando di San Nicolas pa bay traha na hotelnan, ta pasa pafo di e ciudad di Oranjestad. Ta nifica cu turistanan cu sali for di aeropuerto den forma rapido ta yega nan hotel pa por cuminsa disfruta di nan vakantie y e containernan cu ta sali for di Barcadera, ta haci uzo di Watty Vos Boulevard pa yega nan destino. “Esaki ta nifica cu e congestion cu ta experiencia riba L.G. Smith Blvd, ta mengua.

CUMINSA FIN DI LUNA

E trabou nan ta bou guia di e compania Mota-Engil. “E ta bay ta un inversion sumamente grandi cu ta bay yuda inyecta den economia pa creacion di trabou y stimulacion di economia.” Eman a bisa. A sigura cu e procesa encamina tabata uno hopi independiente, guia pa un comision consistiendo di profesionalnan independiente cu a percura pa e seleccion a cana di forma independiente y yuda pa Waterrijkstaat, garantisando sostenibilidad di e proyecto pa pais Aruba. “Minister Sevinger por ta contento y orguyoso di a guia e proyecto di mas grandi cu Aruba a yega di realisa riba tereno di infrastructura. P'esey nos ta contento pa anuncia cu e financiamente y parti tecnico ta cla, y contract a wordo firma” e mandatario a bisa na tal ocasion.