Despues di 6 siman, minister Paul Croes a aparece den publico

SAN NICOLAS – Casi 7 siman despues cu Ministerio Publico a informa cu minister Paul Croes ta un sospechoso den caso di fraude y corupcion, e mandatario a aparece atrobe den publico. E ocasion tabata e celebracion di cumpleaños di colega ministro Mike de Meza diasabra anochi na cas di partido di e partido berde na San Nicolas. “Rondona pa un grupo di amigonan y famia Minister Paul Croes a bay felicita su colega Minister Mike de Meza na ocacion di su cumpleaños” su famia a splica NoticiaCla.com. E tabata algo spontaneo, e portal aki a compronde.

MOMENTO DIFICIL

For di su famianan, e portal aki a compronde cu pa Croes, ‘den principio tabata masha dificil pa sali y haci manera nada no a sosode pasobra en realidad e ta diferente. Sin lubida e echo cu e impacto riba su persona y su famia tabata y ta fuerte’, famianan a bisa.

BISHITA SORPRESA NA SAN NICOLAS

Pero diasabra anochi acompaña pa un grupo di amigonan y famia, Paul a bay San Nicolas den un caravana no prepara, y a bay comparti cu su coleganan. E recepcion ta uno cu e mandatario mes no a spera. E portal aki a compronde cu tabatin sentimento, brasa y expresionnan di sosten y apoyo moral tabata bin di tur skina pa e hoben Minister. Riba su Facebook page e Minister a gradici un y tur cu a compañ’e y ricibie asina grandi.

AGRADECIMENTO NA ESNAN PRESENTE

"Cu un curason yena di emocionnan grandi mi kier a yama danki na un y tur pa un ricibimento unico e inolvidable, cu solamente un partido por duna su miembro, un reaccion caluroso cu un pueblo uni so por duna!” e mensahe tabata.

NADA AINDA DI INFORMACION

Croes ainda ta ‘inactivo’ pendiente di su caso, y e portal aki a compronde cu e mes no tin informacion di kico tur ta spere. A priminti e mandatario cu den 4 siman di tempo lo mester a informe di e detayes di e caso. Esey no a sosode ainda. Fuera di diabierna, e mandatario no a presenta mas den publico, fuera di a informa cu el a biaha pa Corsou algun biaha pa topa cu su abogado Marije Vaders, cu tin e caso den su man. Pa loke ta e areglo legal cu tin cu proteha gobierno y Croes mientrastanto, e portal aki a compronde cu ta trahando riba un concepto di ley cu tin cu ‘regla’ tur esaki. No ta conoci exactamente unda e ‘concepto’ aki ta actualmente. Ta conoci cu mientrastanto Croes tin tur poder di minister y ta esun cu mester firma cualkier acto cu ta regarda su cartera, aunke cu colega minister Bermudez (y actualmente Richard Arends) ta ‘reemplas'e’.

E CASO

Tabata algo mas di 6 siman pasa (28 di maart ultimo) cu Ministerio Publico a acusa e mandatario di Labor y Asuntonan Social y di Hubentud, hunto cu algun di su trahadornan di ta sospechoso di corupcion y malversacion di fondo. Fiscal mayor Erick Olthof a confronta prensa cu e noticia, cu e mandatario aki, ta wordo sospecha di a acepta regalo, promesa y of servicio relaciona cu e mercado laboral, conduciendo na e hecho cu stranheronan por a haya permiso di trabou. Awor ta na Ministerio Publico pa prueba tur loke e ta sospecha e mandatario di dje, y si tin suficiente prueba, pa persigui e mandatario penalmente. De lo contrario, e lo mester seponeer e caso aki.