Di dos anochi di ‘Dreamers’ di Dimas a bay miho awe nochi

ORANJESTAD – Contrario na un siman pasa ora cu cos a hera bay foi man, e anochi di informacion riba amnestia pa hobennan stranhero, conoci como Dreamers a bay mucho mas ordena awe nochi. Un di e motibonan tabata e localidad cu a wordo cambia. A dicidi di cambia e localidad di Dimas pa Cas di Cultura cu tabata carga 550 persona (versus 150 na Dimas). Esaki a pone cu tabatin mas espacio pa tur hende e biaha aki. Loke a yuda tambe ta e fluho di informacion den siman cu a pone cu hopi hende a keda informa caba di otro forma, y cu a dicidi di no acudi mas na e anochi. A compronde cu siman pasa cos a bay for di man debi cu tur hende a kere cu esey tabata e unico chens pa haya informacion y si bo no ta aden, bo ta perde bo chens di ‘keda registra’. Algo cu no tabata e caso. E biaha aki tabatin entre 250 pa 300 persona presente, cu a keda atendi pa un total di 20 trahado di Dimas. Control tambe tabata basta pisa, considerando e situacion. Tanto personal di polis como CEA tabata presente den practicamente tur skina di edificio, pa sigura cu cos por a cana na ordo. Director di Dimas Kathy Ruiz Paskel tabata satisfecho cu e desaroyo di e anochi, segun su comentario pa NoticiaCla.com.