Alvin Koolman: No a para e proyecto di upgrader di CITGO

ORANJESTAD – Ningun momento Citgo a informa gobierno di Aruba cu nan no ta sigui cu e plan pa habri e refineria. Y tampoco ta berdad cu e compania no tin placa. Alvin Koolman como managing director di e compania doño di Refineria di Aruba (RDA), a contesta tur e inquietud y informacion eroneo cu tin ta circula dos dia caba, a base di e.o. un articulo cu e agencia ARGUS a publica. El a haci esaki durante e programa NoticiaCla Merdia na Power FM diabierna merdia. Loke si a keda admiti ta cu Banco Central a bin cu un interpretacion robez di e situacion di e refineria. Esey a crea parti di e confusion. Entre otro e intrepretacion cu e refineria lo cuminsa mas laat cu a premira. 

INTERPRETACION ROBEZ

Segun Koolman, ARGUS a saca un informacion cu CBA a informa. “No ta ARGUS a sake. Ta gewoon nan a copy e press release y e documento cu Centrale Bank a saca” Koolman a cuminsa na bisa. “Mester approach un di e hendenan di Centrale Bank y puntra nan dicon a saca cierto conclusion. Mi ta kere cu basa riba e meeting cu nos tabatin (cu CBA) y lesando e rapport cu mi a lesa, cu tabatin cierto confusion y esey a trece e mensahe cu loke a sali den prensa”.

CITA REPRESENTANTE DI MINITERIO DI ENERGIA DI VENEZUELA

E hecho cu ARGUS ta cita un persona di ministerio di energia di Venezuela cu a laga sa cu no tin e fondonan necesario y no por a genera esaki, tampoco no ta cuadra. “ Ora bo lesa esey, bo ta puntra bo mes ken. Si nan no bisa ken e ta, mi no ta haya cu esey por ta fidedigno. No ta asina cu Citgo no tin placa” Koolman a sigui bisa.

E FINANCIAMENTO AINDA NO TA CLA PERO NO LO TARDA

Koolman a admiti cu berdad e financiamento no ta cla ainda, pero ta cuestion di un luna mas prome cu esaki keda cla. Loke cu Citgo a haci, ta cera un bridgeloan di 200 miyon dollar, cu nan mes a financia. Nan ta trahando aworaki pa sigura e fianza completo di 600 pa 700 miyon dollar. Tampoco ta cuestion cu por tin chens cu e prestamo por cai na awa si e trabounan cu mester haci pa keda cla, no ta suficiente. Segun Koolman, e prestamo a wordo aproba caba ‘pasobra e business plan ta asina solido’. Si nan no keda cla cune awor, lo sigui elabora riba dje te ora cu nan keda cla pa e fianza por wordo ricibi. No ta asina cu si no haya e fianza, e proyecto ta para, manera cu a wordo indica den e articulo di ARGUS. “E lo tarda e proyecto, pero no para e proyecto” Koolman a sigura e portal aki. Scucha e entrevista completo AKI.