Bloke di sindicato cu otro carta pa ministernan riba problema na aeropuerto

ORANJESTAD – Contrario na declaracionnan di e.o. minister Richard Arends y director di douane Ricky Croes, e problema na aeropuerto pa cu seguridad no ta soluciona. Es mas, presidente di e sindicato SADA Eduard Maduro a sigura NoticiaCla.com cu a manda un carta awor pa tres ministers cu un ultimatum. “Si nan no yama e reunion, e ora no ta descarta cu accion lo intensifica” Maduro a sigura e portal aki. “Spera cu no pero ta nan mester soluciona e problematica aki” Maduro a sigui bisa.

BLOKE SINDICAL FORMA

Por a nota e dianan aki cu tres sindicato ta representa e trahadonan di douane y imigracion. Como tal nan a uni formalmente den e causa aki segun e presidente di SADA. “Nos a forma un bloque cu STA, SEPPA y TOPA y conhuntamente nos a manda un carta pa ministers Dowers, de Meza y Bermudez pidiendo un reunion dentro di 24ora” Maduro a bisa. Ta spera cu nan haya contesta riba e topico aki, sino manera indica caba, por spera problema escala.

A KERE CU COS A SOLUCIONA

Inicialmente a compronde merdia durante entrevistanan den e noticiero na Power FM, NoticiaCla Merdia, cu cos tabata soluciona. Tanto minister Richard Arends como director di douane a confirma cu tur cos tabata regla y cu a haya otro y cu accion a termina. Segun Arends, ela reuni un dia prome cu e presidente di SADA y a yega na un acuerdo cu ta e.o. pone 20 posicion di parkeer disponibel ‘bou di e dak’ di solar panels dilanti aeropuerto, compara cu e 50 cu nan tin mas lew, sin dak. Esey tabata un di e preocupacionan. Su sorpresa tabata cu diahuebs mainta toch tabatin accion. Director di douane Ricky Croes mientrastanto a sigura e portal aki merdia, cu tabatin un problema di comunicacion, pero cu esey ta soluciona y cu mester simplemente trata e ‘implementacion di e deal’ di 20 lugar di parkeer mas serca, pero cu a yega na acuerdo y cu e welga como tal a termina pa motibo cu tin solucion.

SINDICATO TA BISA OTRO COS

Pa sorpresa di tur hende, sindicato SADA a desmenti cu cos ta ‘koek en ei’ y cu welga a caba y tur acuerdo ta logra. “Mi a scucha minister Arends tambe y ela keda di informa nos si e logra algo ayera, pero ta te awemainta nos a scucha di directeur y nada concreto” Maduro a bisa. Segun Maduro, ni un bevestiging e directeur por a manda di e proposishon cu tabatin. “E minister a bin cu e voorstel. Y nos tabat 3 di bestuur den e reunion.

Ningun momento nos a yega na un acuerdo” Maduro ta sigura e portal aki. Como tal a manda un carta awor pa ministernan concerni. “Locual nos kier ta locual nos a bin ta pidi pa casi 2 aña, esta parkeer mas cerca” Maduro a bisa.