Arends: Contenido articulo di ARGUS no ta cuadra cu berdad

ORANJESTAD – Contrario na un articulo cu a sali publica awe riba e website ARGUS, tur cos ta ‘on schedule’ pa loke ta e start di e refineria Citgo. “Tur cos ta on-schedule” minister di economia Richard Arends a sigura NoticiaCla.com diahuebs merdia. E articulo a hala hopi atencion mirando e alegacion cu a bin cu ne, for di falta di fondo, te na posponemento di e restart. Como tal NoticiaCla.com a acerca esnan cerca di e proyecto. Entre nan, minister Richard Arends y Managing Director di RDA, Alvin Koolman.

ALEGACIONAN DI E ARTICULO

E base di e articulo ta mustra cu e restart di e refineria ta coriendo un retraso di por lo menos 8 luna y ta nifica cu e plan pa ‘restart’ ta poni te pa juli di e aña aki. Esaki ta nifica cu e plan inicial pa restart na 2018 awor ta bay te 2020. Algo cu e mandatario ta desmenti. Tambe Arends ta desmenti problema cu fondo. Segun e mesun articulo, e Citgo deal ta na peliger pasobra Citgo no por genera fondo pa paga pa loke ta start e refinery. “Financing as far as we know, ta rond” Arends a sigui bisa.

CANTIDAD DI TRABOU

E mandatario a sigura cu contrario na e declaracion di ARGUS, rehab a inicia di aña pasa y ‘e first train lo ta operacional na 2018’. Ademas Arends ta sigura cu for di februari (100 tuma) pa awor tin 400 hende emplea, sa directo y via contractors. Ademas CITGO ta pagando belasting y huur manera debe ser, e mandatario a sigui bisa.

E ARTICULO TA SEÑALA HOPI PREGUNTA

Citando algun fragmento cu a hala atencion den e articulo publica awe, ta haci mencion entre otro (manera indica caba), cu e Citgo deal ta na peliger, pasobra Citgo no por genera fondo pa paga p'e. Asina un oficial di ministerio di energia Venezolano ta bisa e agencia di noticia Argus. E articulo riba e tema ta cita varios fuentenan y tin citadonan preocupante den e articulo publica e siman aki riba e tema. Asina Banco Central ta bisa Argus den e mesun articulo. “E proyecto no por cuminsa tanten financiamento ta cla, y ainda tin aspectonan di esaki cu mester wordo regla, un oficial di Aruba ta sigui declara. “Esaki ta encera gastonan adicional pa provee e refineria cu gas natural cu mester wordo haci pa un pipa for di nort di Venezuela”. “Reunionnan entre Banco Central, RDA, Citgo y un tercera partido cu mester ehecuta e plan pa ‘restaura’ e refineria ainda mester wordo completa” e banco a bisa. “E refineria lo cuminsa su operacion na 2/3 parti di capacidad na 2020, cu full capacidad na 2021” e banco a finaliza bisando. “E comienso di e upgrading na fin di 2016 no por a cuminsa debi na hopi asunto logistico y financiero cu mester wordo poni na ordo” un oficial di gobierno cerca na e proyecto a sigura Argus e siman aki. Informacion cu e portal aki tin, ta cu ARGUS ta referi na e relatonan di banco central y no a papia cu ‘hendenan’ di e instituto financiero. Mester bisa cu Koolman (RDA) no a reacciona ainda riba peticion di e portal aki.