Aruba reconoci como un pais cu ta ‘TsunamiReady’

ORANJESTAD – Aruba a keda reconoci como un pais cu ta ‘TsunamiReady’. Diabierna 5 di mei 2017 director di Meteo, cu ta alaves e Tsunami Focal Point pa Aruba, a reuni cu e director interino di Rampenbureau. Den reunion a discuti diferente topico relaciona cu aviso nan relata na fenomenonan natural. Durante e reunion aki a palabra pa Aruba henter wordo reconoci internacionalmente como un pais cu ta TsunamiReady. E idea ta implementa e plan aki pa 2018, y si esey no logra e ora 2019 lo ta e ultimo plazo.

Pa por bin den remarca pa e reconocimento internacional aki, Aruba lo mester cumpli cu diferente rekisito, por ehemplo mester tin un bon plan di operacion durante un menasa di tsunami, pueblo lo mester ta educa pa por compronde e mensahenan cu ta wordo emiti door di Meteo durante un tsunami, e sistema di alerta mester ta funcional y eficiente, y tambe mester percura cu e areanan di evacuacionnan den un peligro di tsunami mester ta bon demarca. Fuera di e rekisitonan ya menciona, ainda tin diferente otro cu mester cumpli cu ne. Actualmente Aruba ta cumpli cu diferente di e rekisitonan, pero tin algun vital cu Aruba no ta cumpli cu ne. Durante di e ehercicio di Caribewave 2017 a ripara cu tin algun factor cu ta falta y cu ta keda cada bes como un discrepancia.  Pa motibo di e discrepancia nan aki, a dicidi pa bay implementa un TsunamiReady programa pa Aruba. Ora Aruba cumpli cu tur e reglanan internacional e lo ricibi e reconocimento door di UNESCO ICG/CARIBE-EWS como un reconocimento internacional. Den cuadro di e vision di Departamento Meteorologico y di Rampenburo e reconocimento di TsunamiReady ta un prioridad pa 2018. Departamento Meteorologico y Rampenburo ta trahando duro tambe pa reactiva e sistema di alerta CAP. Departamento Meteorologico ta den contacto cu Organisacion Mundial di Meteorologia, pa asisti Meteo y Rampenburo pa asina pronto e sistema di alerta CAP ta funcional bek.