Sindicato cu ultimatum di 24 ora pa gobierno y aeropuerto

ORANJESTAD – Sindicato di douane SADA ta duna gobierno y aeropuerto 24 ora pa yega na un solucion satisfactorio pa loke ta e aspecto di seguridad pa su trahadornan. Si pa diahuebs mainta 10’or no tin un solucion, por spera escalacion di accion di e trahadornan di douane. Asina e presidente di e sindicato Eduard Maduro a bisa NoticiaCla.com awe merdia.

REUNION CU MINISTER

A reuni cu minister Richard Arends cu ta reemplaza colega Angel Bermudez, cu a pidi tempo pa reuni cu e.o. minister Mike de Meza (transporte) y Eman (prome minister) pa wak con por soluciona e problema aki di seguridad. Esey no ta kita afo cu e sindicato ta tene nan ultimatum di 24 ora vigente. Esey tabata e resultado di e reunion merdia entre e sindicato, minister Arends y director di aeropuerto. Mientrastanto, director di douane Ricky Croes a informa e portal aki cu e tabatin un reunion cu director di aeropuerto pa awe 3’or pa wak con por soluciona e problema.

E ACCION DI MAINTA

Manera e portal aki a raporta anteriormente caba, personal di douane y imigracion a bay den accion awe mainta na aeropuerto. Motibo ta e.o. e problema di seguridad cu a conduci e.o. na atraco riba un di e trahadornan di douane e siman aki. “Seguridad a bay for di man” presidente di sindicato di douane SADA Eduard Maduro a bisa NoticiaCla.com awe mainta. “Unabes cu bo ta purba atraca un ambtenaar den uniform na pia di trabou, mi ta kere esey pa nos ta bisa tur cos. Awa a pasa hariña” Maduro a bisa. E accion ta pa dos ora y e personal di imigracion ta den accion tambe pa mustra nan solidaridad na nan coleganan di douane.

PREOCUPACION DI SEGURIDAD

Segun Maduro, Triple A no ta balora trabou di ni imigracion ni douane. Durante un reunion entre director di douane y esun di aeropuerto diamars, a sali afo segun Maduro cu no ta suficiente loke a sali afo. Kier extende e seguridad cu toezicht di un of dos ora mas, loke no ta aceptable pa e sindicato. Segun Maduro, director di Triple A a laga sa cu loke cu nan ta haciendo ta hopi mas cu nan por, pues cu no por pidi mas. “Facil pa nan bisa, nan ta stop 4’or y bay cas. Esnan di warda no” Maduro a bisa. “Seguridad pa trahado no ta existi pa trahadonan na airport” Maduro a bisa. A busca reaccion di director di douane Ricky Croes pero a bisa cu kier scucha tur declaracion prome cu e duna su comentario.

IMIGRACION SOLIDARIO

Trahadornan di imigracion tambe a bay den accion pa mustra nan solidaridad cu e trahadornan di douane. Segun representante di nan sindicato STA sr Vrolijk, e motibo principal ta e atraco riba un duanero femenino. “Nan ta mustra nan repudio pa esaki” Vrolijk a bisa. Tambe kier pidi Triple A pa haya lugar di parkeer mas cerca bou di afdak pa e trahadornan, pa ora cu nan caba traha, nan no tin cu cana lew den scur. Vrolijk a splica cu nan accion tambe ta di dos ora pa ‘manda un statement pa mandatarionan pa nan mira gravedad di e situacion’ aki na aeropuerto.