Homber cu a comete asesinato Webb condena na 20 aña prison

ORANJESTAD - E homber E.J.M.H. a wordo condena awe pa hues di Corte den Prome Instancia pa un castigo di prizon di 20 aña pa asesinato. Corte a haya cu a keda comproba cu ela mata e homber L.A.W. riba 19 di maart 2015 cu un tiro den cabes. Hues a papia awe di un likidacion.

MINISTERIO PUBLICO SU EXIGENCIA TABATA DI 22 AÑA.

E caso contra e sospechoso H. a wordo trata den su contenido riba 9 di december 2016 y 19 di april 2017. Riba 29 di december 2016 hues a dicta un tussenvonnis. Esaki a encera dos opdracht pa Ministerio Publico. E prome opdracht tabata cu Ministerio Publico ta laga scucha e persona sospecha di a duna ordo pa e asesinato, e homber N.R.R., den prizon na Hulanda tocante su rol specifico. E otro opdracht tabata cu ta haci investigacion riba telefon di e sospechoso. Ministerio Publico a presenta e resultadonan di e dos opdrachtnan aki na Corte durante e tratamento di 19 di April 2017.

E homber W. a wordo haya morto sinta den un auto banda di Indian Rock Garden na Hooiberg riba 19 di maart 2015. Aunke e asesinato aki tabatin relaciona cu e participacion di tanto e mes como e homber N.R.R. na gangnan criminal, e sospechoso H. no tabata forma parti di ningun di e dos gangnan aki. E tabata envolvi como sicario.

H. semper a insisti cu e ta inocente, pero tanto Ministerio Publico como Corte ta di opinion cu ta e ta e autor di e asesinato di e victima W.