Personal di douane y imigracion a bay den accion na aeropuerto

ORANJESTAD – Personal di douane y imigracion a bay den accion awe mainta na aeropuerto. Motibo ta e.o. e problema di seguridad cu a conduci e.o. na atraco riba un di e trahadornan di douane e siman aki. “Seguridad a bay for di man” presidente di sindicato di douane SADA Eduard Maduro a bisa NoticiaCla.com awe mainta. “Unabes cu bo ta purba atraca un ambtenaar den uniform na pia di trabou, mi ta kere esey pa nos ta bisa tur cos. Awa a pasa hariña” Maduro a bisa. E accion ta pa dos ora y e personal di imigracion ta den accion tambe pa mustra nan solidaridad na nan coleganan di douane.

PREOCUPACION DI SEGURIDAD

Segun Maduro, Triple A no ta balora trabou di ni imigracion ni douane. Durante un reunion entre director di douane y esun di aeropuerto diamars, segun Maduro cu no ta suficiente loke a sali afo. Kier extende e seguridad cu toezicht di un of dos ora mas, loke no ta aceptabel pa e sindicato. Segun Maduro, director di Triple A a laga sa cu loke cu nan ta haciendo ta hopi mas cu nan por, pues cu no por pidi mas. “Facil pa nan bisa, nan ta bay cas 4’or y bay cas. Esnan di warda no” Maduro a bisa. “Seguridad pa trahado no ta existi pa trahadonan na airport” Maduro a bisa. A busca reaccion di director di douane Ricky Croes, pero a bisa cu kier scucha tur declaracion prome cu e duna su comentario.

IMIGRACION SOLIDARIO

Trahadornan di imigracion tambe a bay den accion pa mustra nan solidaridad cu e trahadornan di douane. Segun representante di nan sindicato STA sr Vrolijk, e motibo principal ta e atraco riba un duanero femenino. “Nan ta mustra nan repudio pa esaki” Vrolijk a bisa. Tambe kier pidi Triple A pa haya lugar di parkeer mas cerca bou di afdak pa e trahadornan, pa ora cu nan caba traha, nan no tin cu cana leu den scur. Vrolijk a splica cu nan accion tambe ta di dos ora pa ‘manda un statement pa mandatarionan pa nan mira gravedad di e situacion’ aki na aeropuerto.

EFECTO DI ACCION RIBA OPERACION DI AEROPUERTO

E operacion di aeropuerto no necesariamente ta sufri bou di e accion aki segun Vrolijk, pasobra tin personal di grens politie y algun otro funcionario a tuma control di e tarea cu mester. Scucha entrevista di presidente di SADA, Eduard Maduro  AKi