Cuater sospechoso caso asesinato Jaburibari den libertad

ORANJESTAD – Un total di 4 sospechoso den e caso di asesinato di Jaburibari (di dia 1 di mei ultimo) a keda den libertad awe. Asina vocero di Ministerio Publico Ann Angela a confirma awe tardi.” E motibo ta cu e investigacion a mustra cu nan detencion no ta rekeri mas” Angela a bisa. Despues di algun dia di silencio, OM a cuminsa duna informacion atrobe. A confirma cu tur cuatro ta ciudadanonan Canades.

OTRO DETENIDONAN

Cu e liberacion di 4 sospechoso, ta keda 4 sospechoso cu ainda ta den detencion. “Nan lo wordo hiba dilanti Hues comisario diahuebs awor” Angela a bisa. Mes momento a confirma cu nan ta sospecha di ‘asesinato’. Tambe a confirma cu OM ta den contacto cu autoridadnan Canades. “E investigacion ta sigui” Angela a sigui bisa. Lo transporta e sospechosonan diahuebs dilanti Hues Comisario y despues lo sigui informa kico ta e siguiente paso, segun Angela.

IDENTIFICACION VICTIMA ASESINATO

NoticiaCla.com ayera manera raporta, a haya e identificacion di e homber cu a wordo tira mata. Segun e corant Canades CBC, ta trata di e hoben Thuy Hoang Nguyen Quach. Mientrastanto su pareha (B. B.) a cuminsa un proceso pa genera fondo pa por traslada e curpa bek pa Canada. Riba su pagina di FB, su pareha ta bisa “Mi a perde mi guy, amante, miho amigo e siman aki”, y ta sigui bisa cu e homber (Thuy) tabata ‘hopi amabel y semper tabata pone otro su dilanti”. Por compronde awor cu e persecucion di Hato y e asesinato ta gelinked cu otro.