Parada cultural lo desplega trahenan di folklore y di cunuco

PALM BEACH - E siguiente parada cultural nacional lo ser teni riba diadomingo 28 di mei saliendo pa 4’or di atardi for di la Cabana Hotel y lo termina na Paseo Herencia mall. E parada lo mustra nos trahenan folklorico y di cunukero , Centro di bario Brazil ya pa varios aña a organisa e parada cultural na Brazil y e parade di lampi. E aña aki a uni forsa cu ‘Pure Aruba Foundation’ tambe conoci pa a organisa eventonan manera ‘Aruba Art Fair’ cu a pone mas di 10.000 persona na San Nicolas pa cu e feria di Arte.

Chico Harms di Centro di Bario Brazil a invita tur esnan cu a yega di participa y participante nobo por acerca su persona via number di CBB 584 6500.

E Parada Cultural Nacional ta mustra nos trahenan folklore, di cunukero y nos lo por scucha nos musica foklorico. Departamento di Cultura Aruba ya pa varios aña ta sostene Centro di Bario Brazil cu nan parada cultural y parada di lampi. DCA ta sostene y aplaudi e iniciativa di e Parada Nacional Cultural, pasobra nos mester mantene nos folklore y cultura bibo. Ta importante pa nos mustra nos turistanan y nos hende local e parti di nos folklore y tradicion.

Pa medio di e parada aki nan ta cera conoci cu nos trahenan, folklore, tradicion y nos musica folklorico. Creando asina un actividad mas cu e aspecto educativo cultural, caminda por documenta esaki tambe. Di e manera aki nos ta mantene nos tradicion bibo di generacion pa generacion cu ta bini. Hunto nos por logra haci e evento aki uno grandi.