Tarifa special anuncia pa Cunukeronan ta un excelente noticia

ORANJESTAD – Gobierno a anuncia tarifa special pa awa pa nos cunukeronan na Aruba. Aruba Dushi Tera no ta solamente e nomber di Aruba su himno pero tambe di un di e cunukonan cu mas produccion localmente. Cunuco Aruba Dushi Tera ta situa na Alto Vista y ta bou maneho di David Kock y Paola Andrea Jimenez.

PRODUCCION DI WEBO

Pa esnan cu no sa: nan ta produci webo cu nan ta entrega na diferente supermercado local. Pero tambe nan ta produci cilantro, pica, cibollin y boonchi. Nan tin un area di cria cu baca y cabrito. Pues un cunuco randi, di cual un di nan retonan sigur ta e awa, pa cual no tabatin un tarifa special.

Sinembargo nan no a keda para. A amplia e area cu un Greenhouse nobo unda ta produci kouseband, prometon, pika y boonchi Arubiano. Tur loke nan ta produci, el a bisa, tin un necesidad pa esaki na Aruba, pesey tambe cu cada biaha nan ta sigui crece. Nan retonan ta keda nan gastonan cu ta hopi halto, pero cu e anuncio di e tarifa special di awa pa cunukeronan, “nos por hala rosea”, sra. Paola Jimenez a bisa.

Gobierno recientemente a sinta cu autoridadnan di WEB NV pa mira con por yega na un tarifa special pa e grupo aki cu ta produci productonan pa consumo local. Siman pasa a logra yega na un acuerdo riba un tarifa hopi special pa cunukeronan. E ta un noticia cu Santa Rosa mesora a plama bou di e cunukeronan, mirando cu esaki ta algo cu nan tabata spera pa hopi tempo. “Esaki ta un bon noticia. Un excelente noticia. Nos como cunukeronan mester di un tarifa mas abou, pasobra e problema na Aruba ta ora bo tin un cunucu e prijs di awa ta hopi caro pa nos sobrevivi cune.

E reduccion di prijs di awa pa Agricultura ta trece hopi cos positivo, Jimenez a bisa, y e kier entusiasma esnan cu kier cuminsa cu nan propio cunucu. E ta baha hopi e gastonan di e cunukeronan.