Entiero di Carlyle De Coteau ta diaranson awor

ORANJESTAD – Director di Directie Scheepvaart, Carlyle De Coteau ta wordo dera diaranson awor, mientras cu diamars awor lo tin anochi di condolencia. NoticiaCla.com a haya confirma cu diamars anochi por condoleer entre 6’or y 9 or di anochi na Aurora Funeral Home, mientras cu e entiero mes lo ta diaranson awor entre 1’or pa 4’or di atardi na Aurora Funeral Home, sigui pa e santana na Zeewijk.

E NOTICIA DI MORTO

Manera cu NoticiaCla.com a raporta anteriormente, despues cu Carlyle a biaha cu urgencia pa Bucaramanga, Colombia recientemente pa problema cu curason, siman pasa dialuna nochi a drenta noticia tristo cu director di Directie Scheepvaart, Carlyle De Coteau, a fayece a consecuencia di complicacion cu ela haya durante su estadia na Colombia. E mester a bay opera, pero no ta conoci si ta durante e operacion el a haya complicacion, of ta despues di operacion y a bin fayece. Informacion cu NoticiaCla.com tin, ta cu for di su baymento pa Colombia, tabata teme pa lo peor mirando e situacion, pero no a perde speransa y tabata spera un mehoracion. Pero destino tabata otro.

NOTICIA A SHOCK TUR HENDE

Asina cu e noticia a plama, hendenan a cuminsa reacciona den un forma di shock. For di su coleganan di trabou, te na ex amigonan di scol, tur no por a kere e noticia. De Coteau tabata un persona sumamente stima den comunidad, for di tempo como hoben den baseball. Despues el a drenta politica y yuda varios politico, entre nan ex minister Otmar Oduber, cu campaña. “Mi a perde mi amigo, ruman. Mi ruman a bay lagami” Oduber a bisa awe nochi ora cu ela tende e noticia. "Mi ta kibra. Un di mi conseheronan principal". Otronan cu a bay scol cu ne, a raporta cu ‘nos a perde nos schoolgenoot’. Forsa na famianan di Carlyle y cu e por sosega na paz.