Herde riba situacion Paul Croes: ‘Si bo puntra ami, ami lo a retira’

ORANJESTAD – Mientras cu fraccion di AVP ta aproba e forma con gobierno a y ta atendiendo e asunto di minister Paul Croes, den sentido cu no nos leynan no conoce un situacion con pa actua asina, miembro di fraccion di AVP Rene Herde a bisa NoticiaCla.com si cu e fraccion berde ta pasando momentonan dificil y tambe ta admiti cu nan ta dividi riba e asunto. “Compolaga” Herde ta contesta NoticiaCla.com riba e pregunta ey. Ademas, e ta mustra cu si e tabata Paul Croes den e situacion ey, e si lo a retira di e funcion.

LANDSBESLUIT PA REGLA ASUNTO DI PAUL CROES CASI CLA

Segun Herde, no a cuestiona e situacion actual di gobierno pasobra e sa cu ta trahando riba un landsbesluit cu tin cu regla e asunto di Croes, y cu esey ta ‘casi cla’. “Awor e ta na Gobernador y e tin cu wordo afgekondigd” Herde a sigui bisa. Mes momento e ta admiti si cu e no sa kico e contenido ta. “Mi no sa, mi no a wak e ainda”. Pero esey no mester ta problema segun e politico di e fraccion berde. E ley aki lo laga cla kico Croes por y no por haci bou di e situacion cu e ta aden aworaki. Mes momento, Herde ta sigura cu fraccion di AVP lo no sostene e ley aki sin mas.

SI TA AMI, MI LO A RETIRA

“Si bo puntra ami, ami lo a retira” Herde a bisa, comparando e situacion cu colega Paul Croes, ora cu e portal aki a puntre si no tabata mas prudente pa Croes retira di e funcion envez di coy e rumbo cu el a coy. E ta un situacion dificil pa e fraccion y fraccion ta dividi riba e caso di Paul Croes. “Tin diferente pensamento pasobra henter e situacion ta dificil pasobra ta un hende cu bo conoce y simplemente e hecho cu algo asina ta sosode, cu ken cu ta, ta dificil. Herde a boga pa nos leynan wordo moderniza pa tin absoluto claridad kico ta sosode den un situacion asina aki. “Ora cu e no tey, bo ta busca algo cu ta mas cerca y transparente posibel” Herde a bisa. SCUCHA E ENTREVISTA COMPLETO AKI