Detencion di sospechosonan Hato/Jaburibari prolonga

ORANJESTAD – E curpa di e victima di asesinato di dialuna a wordo duna liber pa famia awe. Asina vocero di ministerio publico Ann Angela a confirma pa NoticiaCla.com. For di autopsia por a determina con e persona a muri, pero no a divulga e informacion aki pa prensa. E ultimo di 8 sospechosonan deteni den e caso aki ta wordo scucha awe pa huez comisario (e prome 7 nan a wordo scucha ayera). Pero mes momento Angela no por a bisa si tur 8 ta relaciona cu e caso di asesinato of e caso di e persecucion. Pues esey ta keda poco confuso ainda. Loke si ta confirma ta cu e 8 sospechosonan nan detencion ta prolonga por lo menos te fin di otro siman.

INFORMACION DI CANADA

Manera NoticiaCla.com a raporta caba ayera, un di e personanan deteni dialuna despues di un persecucion, ta e sospechoso canades Michael “Teddy” Gibson, segun e corant canades Toronto Sun. Segun e corant, e ta liga na un tiramento di e asina yama RegentPark gang cu a laga un serie di curpa atras. E corant ta relata tambe riba e caso cu a sosode na Aruba dialuna ultimo. Segun e corant, su fuentenan ta bisa cu Gibson ta wordo busca pa e asesinato di Julian Weekes cu a wordo tira mata pafo di un bar na Queens St E banda di Parliament Street dia 2 di april di aña pasa. Weeks tabata bandona un entierro pa Ceyon Carrington cu a wordo tira mata altun dia prome. Ta un asunto di reglamento di cuenta cu a tuma lugar cu a laga 6 persona morto, incluyendo un wela inocente entre Maart di aña pasa y februari di e aña aki. Police di Toronto lo ta na altura di e detencion di Gibson na Aruba pero no ta papiando. Fuente: Toronto Sun Times. Fotos Cortesia Janchi Cadillac.