OM ta persigui Presidente Banco Central Corsou y Sint Maarten pa fraude di belasting

WILLEMSTAD - OM ta persigui Presidente Banco Central Corsou y Sint Maarten Emsley Tromp pa fraude di belasting. Asina nan a informa awe mainta pa medio di un relato di prensa. E investigacion contra Tromp, yama Saffier, a inicia na 2016 relaciona cu informenan persistente den prensa tocante posibel malversacion financiero comete door di e sospechoso. Den e caso aki a tene varios entrada hudicial, entre otro na Banco Central y na cas di e sospechoso. Tambe a scucha algun testigo mientras cu a ricibi tambe documentacion for di exterior. Naturalmente tambe a scucha e sospechoso mes tambe. 

E investigacion segun OM, a conduci na entre otro e sospechoso cu señor Tromp no a pone belasting na altura di tur placa cu el a ricibi entre 2006 i 2014 den cuadro di su funcion como entrada di su ‘pensioenopbouw’. Door di esaki pais Corsou y Sint Maarten a perde di gana posiblemente 5.5 miyon na entrada. 

E investigacion rondo di fraude di belasting mientrastanto a termina y tabata motibo pa Ministerio Publico pa tuma un decision. Ministerio Publico ta spera cu denter di poco dia ta bay emiti e sospechoso un dagvaarding pa e hechonan aki. E dia ey tambe lo bira conoci ki dia e caso den Corte ta keda trata.  Ministerio Publico mientrastanto a pone e sospechoso na altura di e decision. E investigacion pa loke ta trata e otro sospecho nan ta continua. Mas despues ta tuma un decision pa loke ta trata persigui shon di esaki.