ATIA: No mester discuti tarifa di utilidad den un dialogo Social

ORANJESTAD – E gremio comercial Aruba Trade and Industry Association (ATIA) ta di opinion cu e tema riba aumento di tarifa di utilidad no mester wordo discuti den un Dialogo Social, sino den Hunta di Supervision di e companianan di utilidad, caminda cu miembronan di e Hunta y Gerencia lo mester dicidi kico ta e miho manera/caminda pa hasi e companianan financieramente saludabel. Nan decision mester wordo comparti cu gobierno, ya cu e lo afecta aspectonan social di e pais y por tin consecuencianan politico. Por lo tanto e companianan di utilidad lo mester implementa e prijsnan recomenda.

E gremio ta reconoce cu enberdad nan tambe a haya un invitacion di gobierno pa un reunion encuanto “water en energiebeleid”, cu lo tuma luga diahuebs 4 di september. E invitacion ta hasi referencia na e Dialogo Social cu a tuma luga na augustus 2012 (den cual ATIA a participa) unda cu e prijs di awa y coriente a wordo ahusta. Den e Dialogo Social aki partnernan social a dialoga ariba un metodo pa cambia e structura cu awa y coriente ta wordo cobra, hasiendo esaki mas transparente y cooperando pa asina reduccion den prijs di awa y coriente por a wordo realisa na un cierto manera.

E topico cu si mester wordo trata den un proximo dialogo social ta nos Finanzas Publico. Riba 20 di juni 2014, ATIA a expresa den prensa su preocupacion encuanto aumento di gasto di personal den sector publico. ATIA a tuma nota di un aumento remarcabel di Awg 130 miyon den 4 aña. Mas aun, den e ultimo 15 añanan mas of menos 4250 hende a drenta den servicio di gobierno, di cual mas cu 2000 hende den ultimo 5 añanan. ATIA a cuestiona: Kico comercio y pueblo en general a haya bek na servicio? Na unda tur e personanan aki ta emplea? Kico nan ta hasi?

E gastonan di personal ta forma mas di 50% di nos gastonan di Finanzas Publico. ATIA ta keda hopi interesa den un plan concreto, structural y realistico con gobierno lo bay baha su gastonan di personal. ATIA ta di opinion cu no por keda hisa entrada por medio di impuesto solamente. Mester por sondea tambe con pa baha gastonan innecesario. ATIA ta spera cu durante e proximo Dialogo Social por cuminsa hiba discusionnan abierto y sano riba nos Finanzas Publico, en particular bin cu alternativanan pa baha gasto di personal den nos sector publico, sin cu mester tranca nos economia. Foto di archivo ta di miembronan di directiva di ATIA.