Cruz Cora cu porta habri pa publico diadomingo awor!

ORANJESTAD− Dialuna awor ta celebra Dia Internacional di Cruz Cora y Aruba no lo laga e fecha aki pasa keto. Riba 8 di mei, ta recorda e fecha natal di e fundador di International Committee of Red Cross (ICRC), naci na Ginebra na 1828, Sr. Henry Dunant. E ta e prome persona cu e ricibi un Premio Nobel di Paz. Mas of menos 97 miyon di miembro y voluntario ta forma parti di e movecion di Cruz Cora y esakinan tambe ta wordo honra riba e fecha aki. Pa e trabou incansabel di alivia sufrimento humano, sea ta riba tereno social, durante conflicto of guerra, pero tambe durante desasternan natural of otro calamidad.

Pa recorda e dia aki, Cruz Cora Aruba ta invita un y tur pa un “Open House” diadomingo awor, 7 di mei for di 9’or di mainta te 5’or di atardi na Pedro Gallegostraat 12 & 14, Dakota.

Durante e dia aki, lo tin oportunidad pa haci controle di presion y sucu. E popular Charity Bazaar lo ta habri cu tur paña, sapato y cos di cas pa AWG. 5,=., lo tin demostracion di e trabou di voluntario, material y ambulans etc. Y e tan gusta “Pasa Boca Cruz Cora” lo ta habri pa tur cu kier algo di smaak. Foto di NoticiaCla di archivo ora cu Cruz Cora ta den accion.