AVP: Mocion MEP riba Aruparking lo no crea mas benta den caya

ORANJESTAD – E mocion presenta pa MEP contra Aruparking lo no yuda contribui na mas benta (den caya grandi). Asina Rene Herde di AVP A reacciona riba pregunta di NoticiaCla.com pakico a vota contra siendo cu e lider di partido mes a bay di acuerdo pa kita e klem. Segun Herde, e mocion di MEP tabata estrictamente dirigi como un reaccion populista riba un grupo di comerciante cu a protesta. “Cu derecho, nan ta preocupa cu e caida den benta, pero nan ta pidi pa habri Caya Betico Croes y pa stop di klem auto. Y esey no ta e medidanan cu lo contribui na mas benta” Herde a sigui bisa. “Pesey nos a rechasa e mocion y a presenta uno cu ta duna Caya Betico Croes mas perspectiva. E forma con e mocion a wordo presenta, ta pone cu mester a vota contra dje. Esey no kier men cu a vota contra minister president.

NUNCA MESTER A INTRODUCI KLEM

Segun Herde, nunca mester a introduci klem na Aruba. “Simplemente e no ta pas na Aruba y e manera con nos tin cu anda cu otro. Esey nos a bisa ex minister Oduber tambe e tempo ey” Herde a sigui bisa. Ta lastima cu e cambionan cu mester a bin a tarda asina hopi.

MALL PAFO TA CAUSA DI CAIDA DI BENTA DEN CAYA GRANDI

Segun Herde, personalmente e ta kere cu e aumento di mall pafor di ciudad, online shopping y boutique na cas ta e motibo pa cual a registra caida den benta den Caya Betico Croes. “E ta e forma con e comunidad y turista ta haci nan compras awendia. No tur comerciante kier reconoce esaki y ta hunga wega politico populista”Herde a bisa. “Esaki ta conduci na gritonan populista imprudente y decision cu no ta conduci na solucion”. Como tal AVP a bin cu un mocion cu ta bay mas lew y ta busca un solucion pa medio di un concepto cu ta crea mas trafico cu solamente un caya cu tur caminda ta yena cu auto. Segun Herde, no ta intencion pa bin cu un ciudad vibrante ‘a la las vegas’. Un ciudad vibrante no ta un ciudad di apuesta’. “Nos no kier comberti Oranjestad den un ‘Little Las Vegas’. Esey no ta nos escohencia.