Conferencia di polis cu meta pa combati crimen organisa transnational

PALM BEACH – Manera ta conoci dialuna na Hilton Aruba Caribbean Hotel a cuminsa un conferencia di comisarionan di polis di region na Aruba, cu ta caba dia 4 di mei proximo. Comisario Trudy Hassell ta encarga cu e evento aki y ta trata primordialmente e globalisacion y crimen organisa transnational. Esaki a tuma lugar riba peticion di Aruba, segun Hassell mes a splica NoticiaCla.com. E ta encera tur e crimennan cu ta pasa frontera, cu no ta keda na e paisnan. Algo mundial cu ta cuminsa na un pais pero tin ‘proyecto’ tur rond di mundo, y wak con pa actua contra nan. Ademas tin esfuerso pa companianan internacional profila nan productonan pa e cuerponan, pa tira un bista kico tin riba e avansa di e tecnologia pa logra combati crimen.

META DI E CONFERENCIA

Na final di e conferencia, e comisarionan di polis lo bay cera un combenio di cooperacion entre Caribe, y traha un plan strategico con pa ataca e problema di criminalidad den nos regio. Esey ta basicamente e meta principal. Mientras cu e conferencia ta primordialmente dirigi na comisarionan di polis, otro polisnan y instancia hudicial tambe ta invita pa presenta. Un total di 15 tayer ta wordo duna den e 4 dianan aki, unda cu tur personal di polis tambe por presenta. Diferente topico ta wordo presenta manera cybercrime, forensics, leadership policial y mas cu ta wordo trata, cu e meta pa upgrade nos hendenan riba diferente tereno. Tin tambe e aspecto di DNA cu ta wordo trata tambe. Un total di 25 comisario ta presente na Aruba, mientras cu tin 16 VIP cu ta directornan di varios organisacion grandi manera Interpol, FBI y as.

ARUBA SU NIVEL RIBA ASPECTO POLICIAL TA HALTO

Segun Hassell, Aruba pa añanan largo ta purbando di upgrade su mes riba varios tereno. No por a papia di e nivel den Caribe, pero riba bastante nivel por ta hopi orguyoso di e nivel cu nos tin. “Danki na Merca cu ta duna nos hopi oportunidad pa sigui curso, pero tambe Hulanda” Hassell a bisa. Un departamento cu ta avansando bon, ta esun forensico, debi na su ekipahe y e entrenamento sublime segun Hassell.