Van Dishoeck: Exito Opendag Kazerne ta diversividad di actividad cu tin

SAVANETA – “Tur cos a cana bon” tabata reaccion di comandante di Marinierskazerne na Savaneta Timon van Dishoeck. “Hendenan tabata hopi entusiasma, di loke nos por a mira” e comandante a bisa. Mientras cu inicialmente a raporta cu tabatin riba 15 mil hende cu a bishita e facilidad, a resulta despues cu e cifra ta mucho mas grandi, surpasado recordnan anterior, unda cu ta confirma riba 30 mil hende. Un cambio e aña aki ta cu a permiti otro partnernan tambe presenta nan mes y nan trabou. Entre nan bombero, polis, douane y marechausee. “Partnernan cu nos ta traha hunto cu ne”

BON IMPRESION DI E FACILIDAD

Mientras cu berdad tabatin hopi hopi hende na e facilidad, pa e comandante esaki no ta importante. “Importante pa'mi ta cu nan ta haya un bon impresion di mariniers y loke nos por presenta y cu nan sa cu nos ta cla pa actua ora cu mester” van Dishoeck a bisa. No ta facil pa tene un evento asina, mirando cu e ta un facilidad cu normalmente ta cera pa seguridad. Den e caso aki e ta keda un reto segun e comandante, pa habri porta pa comunidad y mustra nan un lugar cu normalmente ta bon cera y cuida. “Nos a pensa hopi riba esey y nos ta laga hende mira loke cu nos kier pa hende wak. Asina simpel e ta. Esey kiermen cu nos por mucho mas cu loke cu nos ta laga mira” van Dishhoeck a laga sa.

IMPORTANTE PA ILUSTRA PA COMUNIDAD

Mientras cu tin un sin fin di actividad, e mas importante tabata pa laga mira e demonstracionan militar, manera e aterisa riba lama di e unidad amfibisch, y e bishita na e bapornan. E exito di e dia ta sinta na e hecho cu e ta un dia liber cu hopi hende por mira yen di cos, cuminda, actividad y tene tur hende ocupa. Tin un mix grandi di loke por haci. E facilidad pa tin tambe cuminda, ta haci’e aun mas interesante. NoticiaCla.com a compronde cu un famia ta pasa por lo menos 3 ora den e facilidad prome cu nan coy caminda pa cas atrobe. Un di e posibilidadnan cu sa sosode tambe ta e interes crea pa Arubianonan registra y meld y bira marinier. E proceso pa solicita a stop e aña aki, ya cu tin suficiente caba. Tin un total di 40 persona cu ta bay cuminsa e proceso di keur pa nan drenta e servicio. “Nos ta spera cu esaki ta suficiente pa fortifica e Arumil” van Dishoeck a finalisa bisando. E comandante mes no tin ni un aña na Aruba (ela cuminsa mitar di aña pasa) pero ya ta completamente ‘ingeburgerd’ cu e comunidad di Aruba.