Pa falta di ley, awor por parkeer ‘gratis’ sin haya multa

ORANJESTAD – Pa motibo di falta di ley nobo, hendenan lo no mester paga pa parkeer por lo pronto. Director di Aruparking Teo Croes a confirma pa NoticiaCla.com cu enberdad debi na e ‘loophole’ aki, un hende cu no a paga pa parkeer den un parkeervak marca, no por haya klem mas y no por wordo cobra otro tipo di multa. Esey ta e consecuencia di e decision di prome minister Eman ayera door di elimina e klem riba presion di comerciante, sin cu e ley nobo tabata cla. “Enberdad sin ley (nobo) bo no por haci nada” Croes a confirma pa e portal aki. E ta admiti cu loke a wordo crea ta un ‘freebie’, osea un loophole cu a wordo crea. “Corectamente. Esaki ta un loophole cu a wordo crea. Mi ta spera cu aki un luna, mes sincero cu e comerciantenan tabata pa protesta contra e klem, nan bin bisa si nan benta a aumenta of no”.

REGISTRO DI ESNAN CU NO A PAGA

Awor e parkeerwachternan lo bay registra simplemente esnan cu no a paga pa parkeer (den e vaknan marca). Otro cos no por haci, pasobra no tin ley nobo (otro cu esun di klem) cu por uza pa multa un persona. E unico forma pa multa hende ta si nan parkeer malo p.e riba acera of skina, lo wordo getouwd di biaha. Antes tabata pone klem y duna e persona chens. Tambe un hende cu para den geel, cu no tin e permiso necesario, lo wordo getouwd di biaha. “Pues enbes di klem, lo touw e persona di biaha” Teo Croes a confirma awe mainta pa e portal aki.