Hulandesnan frustra cu red tape pa por establece na Aruba

ORANJESTAD – Frustracion riba e proceso di haya permiso pa sea biba y traha na Aruba siendo un Hulandes a pone Ruud van Heeringen, un ciudadano Hulandes cuminsa un movimento cu intencion pa haya ‘generaal pardon’ pa netamente e grupo aki. E burocracia largo e innecesario segun van Heeringen, ta pone cu hopi Hulandes ta frustra y ta bandona nos isla, siendo cu nan por a inverti y habri negoshi. Van Heeringen no ta considera esaki husto y awor ta buscando pa cambia esaki. “Mi ta papiando di experiencia propio y tambe door di papia cu un cantidad grandi di Hulandes cu ta frustra. “Si mi scucha di e experiencia cu e Hulandesnan ta pasa den un trayecto pa pidi permiso, e ta mucho dificil y complica. Tin hopi contratiempo pa por cuminsa un bida na Aruba” van Heeringen.

FACEBOOK PAGE

Van Heering a cuminsa un facebook page yama ‘generaal pardon’ pa wak si asina por logra un pardon general pa Hulandesnan riba nos isla y pa un simplificacion di e procedura pa ciudadanonan di Reino. Segun van Heering su splicacion na NoticiaCla.com, no a acerca e instancianan manera p.e. DIMAS pa por haya un oido oficial. “Awor nos a cuminsa nos trayecto, pero tin combersacionnan ‘den backround’ cu ta sostene nos”. Pero segun van Heering, hopi tin miedo pa bin cu nan ‘storia’, pasobra nan tin miedo cu nan lo no haya nan permiso y cu nan lo por wordo saca for di Aruba.

SIMPLIFICACION DI PROCESO

E intencion ta pa simplifica tanto e permiso di estadia, di trabou y pa por cuminsa un negoshi na Aruba. “Un ehempel mas recien cu mi por corda, ta di un persona cu a pensiona na Hulanda, tin dos cas na Aruba, cu un AOV no por drenta Aruba pasobra nan no tin suficiente fondo. Un di e casnan ta na huur, tin suficiente fondo pa biba na Aruba, pero ta pone condicionnan asina dificil pa biba na Aruba. Mientrastanto e persona a biaha bay Hulanda bek pasobra e no a logra” van Heering a bisa. E ta conciente cu djis lanta un pagina di Facebook no ta suficiente y cu tin cu bay ranka basta na e palo (di proceso) prome cu e ‘blachinan’ cuminsa cay. E pagina no ta solamente pa hendenan cu tin problema cu e proceso, pero tambe pa hendenan cu kier ta solidario na e proceso.

TA SPLICA E REACCION HAYA NA DIMAS

E loke cu van Heering ta cuestiona tambe, ta e forma con ta trata cu nan na Dimas. “ Ora cu a bay Dimas, dado momento a bisa literalmente door di un trahado di DIMAS, ‘ señora bo ta un stranhero y bo ta keda un stranhero. Ni si bo biba 30 aña aki, bo ta keda un stranhero. Esey no ta e forma di anda cu ciudadanonan di Reino na Hulanda”.

SU SITUACION PERSONAL

Van Heering ta mustra cu e mes ta residencia na Aruba tin un permiso di estadia, y a acerca un compania pa yuda facilita nan papeleo pa bin na e permiso. “Pero ta absurdo cu bo mester pasa via bueltanan pa por legaliza bo estadia. Si bo bay Hulanda, bo ta bay departamento social y nan ta dunabo bo yabi di cas. Aki esey no ta e caso. Nan ta bisa cu tin miedo cu e isla ta keda inunda cu ciudadanonan Hulandes . E experiencia ta cu esey no ta e caso. Pues atrobe, su meta ta pa agilisa e proceso pa por facilita e Hulandes Europeo cu su papel mas lihe, siendo un ciudadano di Reino.