A wak di St Maarten con pa actua den caso di Paul Croes

ORANJESTAD – Mirando cu no tin ley na Aruba cu ta cubri un situacion manera cu minister Paul Croes a haya su mes aden (sospechoso di varios cargo siendo un minister den funcion), gobierno di Aruba a opta pa wak leynan di St Maarten pa actua. Asina prome minister Mike Eman a declara den parlamento diamars atardi, den e reunion cu a trata riba e asunto di Paul Croes. Mientrastanto a duna departamento legal di gobierno orden pa a base di e ehempel di St Maarten, crea algo pa Aruba pa por uza den e caso aki. Ora cu ta asina leu, lo bin parlamento pa presenta e producto final. Mientrastanto a opta pa tuma e carteranan di Croes temporalmente. Esey ta e splicacion duna door di Eman di con a actua manera cu a actua den caso di Croes, y cu no a resorta na retira e minister manera cu hopi ta puntra. E mandatario no a clarifica si, si a aplica e ley pa duna e otro minister e poder legal pa actua riba e carteranan di minister Croes. 

CARTA DI CROES

Ta riba peticion di Paul Croes, segun Eman a splica diamars, a cuminsa e proceso di wak con pa atende cu e situacion nobo aki. Croes a acerca gabinete pa medio di un carta, pa aleha y laga ministerio publico haci su trabou den e investigacion contra su persona.

SITUACION COMPARA CU ST MAARTEN

Bek pa e analogia uza, segun Eman, ora cu Croes a haci loke ela haci, gobierno a haci un analisis pa wak kico e posibilidadnan tabata bou di e circumstancianan aki, y con esaki a wordo regla den otro pais. Esaki pasobra e situacion como tal no ta regla den nos constitucion. Eman a cita constitucion di St Maarten pa compronde pakico tabata corecto na analogia di e locual a wordo regla den ley na St Maarten. Den e constitucion di St Maarten p.e., ta haci un diferencia entre un persona cu ta un sospechoso y un persona cu ta condena. Ta uza e articulo 36 di staatsregeling cu e minister cu ta condena sin chens pa apelacion, e mester wordo retira mesora di su funcion como minister. Pero den caso di sospechoso, e ta wordo geschorst en caso e ta den un detencion temporal a consecuencia di un crimen cometi. Sinembargo, Eman no a bisa pakico no a opta pa schors e mandatario, siendo cu ta uzando e analogia di St Maarten. 

POR SIGUI TRAHA SIENDO UN SOSPECHOSO

Segun Eman, ta importante pa uza esaki pa ilustra cu na paisnan p.e manera Merca, ora cu kier a cuminsa un caso contra p.e Hillary Clinton, no a strobe di core campaña pa bira presidente di Merca. Ora cu bo ta un acusado, segun Eman, ta diferente cu ora cu bo ta acusa. Asina Eman ta mustra cu e loke a sosode na Aruba, tabata e paso corecto. “Cada persona por tuma pa su mes kico e ta haci. Pero esnan cu ta aplica regla, esnan cu tin cu wak cada caso a base di terminologia obhetivo, tin e tarea pa haci un diferencia entre ora cu un persona ta sospechoso, acusado, of ora cu un persona ta ya ta condena” Eman a bisa.

A DUNA PAUL CROES BENEFIT OF THE DOUBT

P'esey a tuma e direccion di un persona cu no ta condena, ta husto pa e persona tin benefit of the doubt. “Nos a escoge pa na analogia, pa cana e caminda ey di belet cu e articulo di ley cu e minister no por sigui y nos a dicidi e ora pa tuma over su carteranan” Eman a bisa. Departamento di Wetgeving mester a tuma na nan encargo mesora, cu a base di e leynan di St Maarten, si Aruba por tuma un decision similar pa loke ta e caso specifico aki. E ora lo bin parlamento cu e producto crea pa e departamento, pa un caso asina.

PAUL CROES KIER A ENTREGA SU CARTERA

Segun Eman, colega Paul Croes a tuma e posicion y bisa cu e kier entrega su cartera pa ningun momento tin ningun duda cu ministerio publico mester cana un proceso sin wordo interumpi den su trabou. E prome mandatario a haya cu Croes asina a mustra e humildes y grandesa cu no a mira den e gobernacion anterior caminda ministerio publico lo tabata wordo stroba, persigui y acusa continuamente.