Protesta awe mainta pa ‘no klem’ mas y ‘habri caya bek’

ORANJESTAD – Den un accion organisa pa un di e comerciantenan di Caya Grandi (Caya Betico Croes) Tatiana Eman-Mallarino, hunto cu un grupo di doño di negoshi y trahado a marcha cu pancarta pa Parlamento pa protesta e hecho cu ta klem auto, causando problema, y alabes a bay cu e peticion pa gobierno ‘no klem, habri caya bek’. Cu e meta ey, a marcha bay Parlamento, drenta e reunion riba situacion di minister Paul Croes, y exigi di prome minister Mike Eman pa inmediatamente kita e asunto di klem, y habri caminda. Eman, manera cu NoticiaCla.com a raporta caba, a bay di acuerdo mesora y priminti pa kita e klem. “Awel awe nos ta kita e klem. Awe nos ta haci’e” Eman a bisa. No a bisa si, ki dia ta habri caminda atrobe. Ora cu Eman a haci e promesa, e grupo a sinta den tribuna y keda trankil.

A TARDA PA TENDE CONCLUSION CAYA HABRI

Un di e motibonan pakico a protesta, ta e tardanza di gobierno pa informa comerciantenan kico e consecuencia di tene caya habri tabatin. “Nunca mas a tende di gobierno” Tatiana Eman- Mallarino, e organisador di e accion di awe mainta, a bisa Eman durante su encuentro spontaneo den Parlamento.