Reclamo di Plasterk a agilisa entrega presupuesto 2015 na gobernador

ORANJESTAD – Reclamo di minister hulandes Ronald Plasterk siman pasa cu presupuesto di 2015 di Aruba no ta cla ainda, a pone cu gobierno di Aruba a dicidi di entrega e concepto di e presupuesto na gobernador siman pasa. Segun minister Bermudez, cu e paso ey, kier a mustra Plasterk cu e informacion cu e mandatario hulandes tin, no ta cuadra y cu debidamente Aruba su presupuesto ta cla, aunke den concepto. Concepto pasobra ainda falta informacionnan manera e relato di e ‘backoffice’ di CFT cu tin cu keda cla otro siman y adaptacion di ley di e.o. pensioen.

Segun Bermudez, por a laga e presupuesto den lachi wardando e loke falta, pero a opta pa lague cuminsa cana su trayecto, door di entregue e ora na gobernador. Mientras cu Bermudez ta admiti cu ta declaracion di Plasterk a pone actua diferente, e ta refuta cu ta un yamada di telefon e la haya diahuebs despues di e encuentro entre premier Eman y Plasterk cu a pone actua. “Mi no a haya ningun jamada” Bermudez a bisa.

Bermudez ta refuta tambe cu e presupuesto a wordo entrega ‘no completo’.”Nos presupuesto ta cla”, e mandatario a sigura NoticiaCla.com. Loke sinembargo falta, ta posibel ahustacion di CFT. Porta tin cu bin cu un nota van wijziging ora cu otro siman e rapport keda cla, pero e presupuesto ta cla.