Bermudez: Plasterk no ta papia berdad di nos debe

ORANJESTAD – Debe di Aruba segun minister di finanza Angel Bermudez, no a bira doble manera ta wordo bisa. “Nos debe a aumenta cu 30% den ultimo cinco aña” Bermudez a sigura NoticiaCla.com, pero no doble manera ta wordo bisa. E hecho cu su colega hulandes Ronald Plasterk a bisa cu e debe di Aruba a dobla den ultimo 5 aña pues no ta cuadra.

E declaracion aki a bin na momento cu NoticiaCla.com a confronta e mandatario di finanza cu e informacion cu ta propio prome Minister Eman lo a declara esaki na media hulandes. E mandatario a refuta esey bisando cu e no sa unda e informacion ey a bin y cu tin mas biaha cu e ta tende declaracionnan haci cu no ta cuadra. “Mi no sa pasobra mi no a tende e declaracion ey’ Bermudez a bisa. Y ta eynan e la referi na declaracionnan haci di e.o. su colega Plasterk cu a bisa cosnan cu no ta berdad.

Ta conoci cu den ultimo lunanan, minister Hulandes Ronald Plasterk a declara na varios occasion cu Aruba su debe ta preocupante ya cu e la bira net doble den e ultimo 5 añanan y cu esaki ta un precupacion grandi di Hulanda. Un declaracion cu segun Bermudez, no ta berdad y como tal no sa unda Plasterk a bin cu e informacion aki. “Mi ta haya cu ora hende sali den media bisa algo, nan mester ta bon informa si” Bermudez a bisa na NoticiaCla.com, indicando cu Plasterk ta bay den media, dunando informacion incorecto na comunidad.