Canades biahando pa Aruba, baha di buelo di United pa no cumpli cu orden

NEWARK – Un muher Canades na caminda pa Aruba a wordo saca for di un buelo di United Airlines. Esaki a sosode algun siman prome cu un docter a wordo ‘lastra’ na man cu pia for di un otro buelo di e mesun aerolinea, y a keda raporta pa Global News. E caso ey a haya atencion internacional y cu e siman aki a wordo ‘gesettled’. Awor ta resulta cu hasta un dama biahando pa nos isla, tambe a bira ‘victima’ di e aerolinea. Cathy Caride Watson a pidi pa un stul cu mas espacio pa pia, pa motibo di su mobilidad limita. Ora cu e aerolinea a bisa Caride cu e mester paga 149 dollar extra, ela nenga di paga. E motibo ta cu nan lo a bis'e na gate cu e suma ta mucho mas abou, pero pa motibo di tempo, e no por a paga pa esey e ora ey. Watson tabata caminda pa Aruba pa celebra su cumpleaños cu su ruman, a cambia di stul, pero a wordo bisa cu e mester a bandona e avion. “Nos crew a traha cu Caride pa un asiento mas comfortabel. Nos a ofrece un upgrade pa Economy Class, pero ela nenga. Ora cu e no a sigui orden di e personal di cabina, ela wordo bisa pa bandona e avion. Ela biaha e siguiente dia cu mas espacio pa pia, y no a cobr’e ningun cen extra. E caso aki ta pasa basta, pero e ta haya atencion mirando e forma con e aerolinea aki a trata un pasahero apenas algun dia atras cu tambe a rechasa pa bandona e avion. Den e caso aki a lastr’e, causando daño na dje y a bira un asunto bergonsoso pa e aerolinea. Scucha e entrevista cu e pasahero AKI.