Falta pa sirbi e interes di e prohimo por pone henter un nacion sufri

ORANJESTAD – Durante e discurso di Gobernador Alfonso Boekhoudt na ocasion di su prome ‘Oranjebal’ diaranson ultimo, ela manda algun un mensahe fuerte pa comunidad. Entre otro cu egocentrismo ta pone gobernantenan actua cu interes robez. Tambe cu como pais mester crea un ambiente di duna cuenta pa decisionnan tuma, y crea asina e confiansa. Cosnan cu lo mustra cu nos ta den un pais madura. Esnan presenta a reacciona riba e discurso indicando cu tabata claro cu Gobernador tabata mandando un mensahe cla: Cosnan tin cu cambia pa nos isla por progresa.

FALTA PA SIRBI INTERES DI PROHIMO.

Un di e puntonan menciona ta e problema di egocentrismo. “Nos por ta contento cu nos tin un Rey cu ta convivi cu nos. Pasobra nos tur mester admiti cu no ta facil pa ta un gobernante den un era caminda cu egocentrismo ta domina. Un era den cua nos ta mira cu e falta pa sirbi e interes di e prohimo por pone henter un nacion sufri”. Hopi a capta e mensahe como uno dirigi na nos gobernantenan cu lo ta actuando cu interes robes. “P'esey e miho regalo cu nos por duna nos Rey – si boso a tende bon, nos por duna Rey Willem-Alexander un regalo – esey ta, cu nos lo percura cu como pais nos desaroya den un forma sano e tempo cu tin nos dilanti.” Gobernador a sigui bisa. Y bisando esaki el a haci un apelacion pa na Aruba nos enfoca riba (y duna un man na) esnan den necesidad y riba nos naturalesa.

DUNA CUENTA PA DESICIONAN TUMA

E di cuater punto menciona como regalo na nos Rey, ta esun di duna cuenta. "Ora bo ta duna cuenta di bo decisionnan cu bo a tuma, di accionnan cu bo a haci, di maneho cu bo a hiba y encargonan cu bo a completa, bo ta mustra e otro cu bo ta tuma responsabilidad pa e consecuencia di loke bo ta haci." Asina Gobernador Boekhoudt a bisa. “Un comunidad madura ta uno den cua hendenan ta duna cuenta na otro y asina ta carga nan responsabilidad. E falta di un ambiente di duna cuenta ta pone cu nos ta cay pa e tentacion di ta culpa otro pa tur cos, incluso di nos propio faltanan”. Segun Gobernador, no ta falta di respet ni tampoco grosero of bruto pa puntra un hende pa duna cuenta: e lo crea mas confiansa si nos tur ta duna cuenta honestamente. Lesa e discurso completo AKI.