Minister: Tin fecha nobo pa introduci health tax

ORANJESTAD – Ta prohibi pa bo cobra un impuesto cu no ta existi. “Y si bo hacie toch, bo tin cu entregue na e departamento di impuesto”. Palabra di minister di Finanza Angel Bermudez na NoticiaCLa.com. Unda cu gobierno tende cu a haci esaki illegal, ta nifica cu e consumidor mester nenga di pag’e. E problema ta cu a anuncia cu 1 september e ley lo mester a drenta na vigor. Y como cu no a tende nada mas, algun comerciante a cuminsa cobra esaki caba for di dialuna ultimo.

Gobierno no a logra implementa e asina yama bestemmingsbelasting cu nan a yama ‘health tax’ pa 1 september di e aña aki. Awor e intencion ta pa purba keda cla pa introduci esaki pa 1 october. “Esey kier men cu nos a perde un luna di entrada” minister di finanza Angel Bermudez a bisa. E la cay un tiki laat, pero segun Bermudez tur hende sa kico e causa di esaki ta. (desaroyo den July).

E proyecto di ley a wordo entrega pa bay den e trayecto di legislacion. “ultimo señal cu mi tin ta cu Raad van Advies ta finalisando nan conseho riba dje y nos ta bay haye un di e dianan aki” e mandatario a sigui bisa. Ora cu esey tuma lugar, lo entregue na Staten pa por trate den un reunion publico y asina converti e den un ley. Awor ta purba speed up e proceso pa e por keda cla. E hecho cu e no a cuminsa funciona, ta traduci den un luna cu no por a cobra e placa aki. “Mi ta prefera pa e cuminsa wordo efectua den e comienso di luna, pues no ta perde entrada den esey”.