Conseho cla aki dos siman con reemplaza SAC

ORANJESTAD – Aki dos siman tin claridad riba e destino di Aruba su carnaval, y mas importante, den ki forma esaki lo continua. Minister di cultura Otmar Oduber a bisa diaranson mainta cu un comision di por lo menos 9 persona a keda instala, cu tin dos siman pa concretisa e plannan pa un proximo organisacion cu tin cu bay dirigi nos carnaval. Unabes cu e comision bolbe cu su recomendacionnan, lo transforma e ideanan y plan aki den un instancia oficial nobo di carnaval, cu tin cu cuminsa traha rapidamente riba nos proximo carnaval.

E miembronan di comision ta hendenan profesional den nos comunidad, y ta presidi pa conocido accountant Ryan Kock, Patrick Melchiors, Rossy Marchena, Sr Dumfries, Renny Lacle, Ronny van Trigt, Irma Gordon, Chucho Hoek, y un persona di Deloitte & Touch. Nan tarea apunta pa nan ta pa dentro di 2 siman, inventarisa, prepara y conseha un plan pa gobierno pa determina si ta bin un fundacion un asosacion of un otro tipo di organisacion cu tin cu lidera nos carnaval.

Nan tin cu reuni cu tur actornan den comunidad, cu tambe ta inclui Stichting Arubaanse Carnaval. Unabes cu esaki ta completa aki dos siman, lo formalisa e grupo nobo cu ta lidera e carnaval. E mandatario a bisa cu e ta conciente cu ainda tin un caso posibel pendiente di SAC contra gobierno y como tal nan ta prepara pa esaki tambe.