Modelo presenta pa reunificacion familiar pa mucha stranhero

ORANJESTAD - DIMAS den cooperacion cu Departamento di Enseñansa y e bestuur di scolnan, a start cu un campaña di conscientisacion y di informacion via di scolnan preparatorio, basico y secundario. Meta di e campaña aki ta pa yega mas cerca di e grupo meta, cu ta e muchanan stranhero - y via di nan alcansa nan mayornan residente aki na Aruba y duna nan informacion di maneho y proceso di aplicacion di permiso di residencia na Aruba.

Hopi mayor stranhero corectamente ta mantene nan mes na e maneho y conforme regla ta percura pa anualmente haci e aplicacion pa e permiso necesario pa nan yiunan. Y e muchanan aki cu tempo hasta por adkiri - via di naturalisacion - nacionalidad Hulandes. Pa mas informacion referente con pa bira Hulandes ta referi na Kabinete di Governador. Den practica tin tambe mayornan di muchanan stranhero cu - pa un of otro motibo - no a of no ta percura semper pa e papelnan di estadia di nan yiunan ta continuamente na ordo. Tambe tin casonan unda e mayor a haci un intento, pero no a logra cumpli cu rekisitonan stipula.

E muchanan aki a bin ta forma parti integral di nos sociedad y ta participa activamente na nos systema di educacion, maske nan status legal no ta of tawata (semper) na ordo. Lamentablemente por constata cu tin cantidad di hobennan of muchanan cu na momentonan crucial den nan bida - sea nan ta den examen, a keda escogi pa forma parti di un seleccion nacional, of mester bay un schoolreis, of nan a bira malo y mester atencion medico, ta haya nan confronta cu un realidad cu - maske nan ta full integra y ta biba aki pa largo tempo - y nan mes no por a haci algo al respecto, pero a confia cu nan mayornan lo percura pa esaki.

Cu e campaña di informacion y conscientisacion DIMAS kier suministra informacion relevante di e maneho vigente di reunificacion familiar y tambe DIMAS ta bay splica y mustra kico mester haci pa semper tin e permiso di estadia na ordo. DIMAS ta spera cu e campaña aki por yuda contribui y haci cu mayornan mihor informa y mas consciente di kico pa haci pa tin tur cos conforme regla.

Pa por aplica pa reunificacion familiar pa muchanan mester tene na cuenta lo entre otro suguiente:

* Mester por comproba cu ta trata di un yiu legitimo

* E mucha mester ta menor di 12 aña, si e no ta domina e idioma Hulandes. Esaki ta relaciona cu e posibilidad pa un mihor aansluiting di dos systema di educacion y e barera di idioma. Den caso cu e mucha ta mayor di 12 aña, pero a logra pa ser admiti den un institucion escolar, lo tene cuenta cu esaki.

* E mayor responsabel mester por comproba cu e tin minimal 3 aña cu residencia legal. Excepcion ta aplicabel pa posicionnan cu segun maneho ta determina como clave.

* Den cierto casonan e mayor mester tambe comproba su persona custodia di e menor

* Y den cierto casonan e mayor mester comproba cu tin e autorisacion di e tata (den exterior) cu e mucha por biba cerca su mama na Aruba

DIMAS tin e formulario di aplicacion den idioma spaño y ingles disponibel. Y tambe e lista di rekisitonan ta na idioma ingles y spaño obtenibel.

Proyecto Dreamers

Pa un tempo cortico - den luna di mei y juni 2017 y riba fechanan specifico - lo duna oportunidad na muchanan cu ta residencia pa largo tempo (mas di 10 aña) y cu a haci nan formacion escolar aki na Aruba (pa un minimo di 5 aña) y ta cumpli cu algun rekisitonan adicional (identidad y conducta), un oportunidad pa obtene un titulo di estadia permanente. Lo trata na yega na e grupo aki via di scolnan y lo invitanan en particular pa atende anochi di informacion y tambe lo duna cita na nan pa bin DIMAS pa aplica pa e titulo di estadia permanente aki. Ta estima cu e grupo aki ta alrededor di 400. DIMAS lo comparti e resultado final di e proyecto comienso di juli.