Hulanda no kier coopera pa Aruba fia cu interes abou

ORANJESTAD – Aruba tin cu refinancia su debenan bieu, pero no por haya Hulanda pa ‘asisti’ cu un interes abou. Asina minister di finanza Angel Bermudez a splica NoticiaCla.com recientemente. Segun e mandatario, ta un wega politico Hulanda ta hungando cu Aruba y esey no ta corecto. “Como cu nos no tin modo pa paga nan (debenan bieu), nos tin cu refinancia nan” Bermudez a bisa. E aña aki esey no ta un excepcion. E mandatario ta referi na e 440 miyon florin na debe cu Aruba tin, mientras cu e deficit ta ‘apenas’ 25 pa 26 miyon. Recientemente minister Hulandes Ronald Plasterk mes a confirma pa NoticiaCla.com cu mientras cu Aruba ta riba bon caminda pa regla su asuntonan financiero, no ta asina leu cu Hulanda por yud'e haya financiamento cu interes abou. "Zover is het nog niet", e mandatario a bisa na tal ocasion. Algo cu atrobe Bermudez ta confirma. E mandatario ta na Hulanda pa un bishita di trabou y dialuna a topa e mandatario riba un cantidad di topico. Pero e topico aki, por lo pronto, lo no haya oido cerca Hulanda. 

ARUBA NO TIN PROBLEMA PA HAYA FIANZA

A mustra cu Aruba no tin problema pa haya fianza pa refinancia, y tur ta a base local. Bermudez a splica cu mercado local a inscribi pa 1.2 biyon florin riba un suma di 100 miyon. Como tal, segun e mandatario, e ‘apetit’ t'ey pa duna gobierno e placa, contra un interes cu tabata 4.5%. Ta bay haci e prestamonan asina e aña aki te ora yega e suma menciona pa por cumpli cu e creditornan. Problema ta e tasa di interes halto cu Aruba tin cu paga, compara cu e financiamento cu Hulanda ta duna tanto Corsou, Bonaire y Isla Riba na 1 ½ y 2% di interes. “Nos ta e unico pais den Reino cu Hulanda no kier facilita nos e fianza ey” Bermudez a sigui bisa. No obstante e hecho cu e no ta trece ningun risico pa nan. Aruba tin un bon record di pago segun e mandatario.

PA MOTIBONAN POLITICO HULANDA TA STROBA ARUBA

Bermudez ta sigura e portal aki cu ta pa motibonan politico Hulanda ta strobando Aruba. E mandatario ta mustra cu Hulanda ta blo recorda Aruba riba e acuerdo di diahuebs santo, pero tin terminologia nan aden cu ta fayo. Entre nan Hulanda ta papia di financiamento duradero. “Kico esey kiermen?” Bermudez ta puntra. “Kico ta duradero”. Tambe ta papia di un nivel di debe nacional cu ta internacional aceptabel. “Kico esey ta” Bermudez ta sigui bisa. IMF ta bisa cu e ta depende di bo economia y masha otro cos. “Nan (Hulanda) no ta defini e cos. Y esey ta pone cu cada bes bo ta keda den e discusion ey. Boso a yega (na e meta)? No, boso no a yega. Ami ta bisa, esey ta un wega politico!” Bermudez a sigui bisa. Como tal Hulanda ta retene Aruba di e facilidad y ta algo cu e mandatario ta lamenta.