Ni maske kier, no por baha gastonan di personal manera ta pidi

ORANJESTAD – Mientras cu tin un personeelsstop, tin un VUT y ta reduciendo e aparato gubernamental, gastonan di personal ta sigui halto. Ni maske e kier, e minister di Finanza Angel Bermudez a splica, no por bah'e. Bermudez ta splica cu e gasto di personal lo keda un problema pa Aruba, ni maske cuanto instancia bisa cu e mester wordo reduci. “Den tur presupuesto anual bo tin un gran automatismo” Bermudez a splica NoticiaCla.com. E ta referi entre otro na e gasto di personal cu constantemente ta haya critica cu no ta bahando. E mandatario ta mustra riba contractnan largo, cu ta un parti grandi di personal.

MOTIBONAN PAKICO NO POR REDUCI E GASTONAN

Bo tin periodiek cu tur hende ta haya, bo tin promocion, pago di jubileum” Bermudez ta uza como ehempel pakico ta dificil pa baha e gastonan. “Den tur bo presupuesto, bo tin un parti grandi, cu ta fiha y cu ta automaticamente tin crecemento”. Esey ta tur caminda, incluyendo na Hulanda. “Ta un margen masha smal bo tin den bo presupuesto cu bo por trece maneho nobo. Pero cada gobierno cu kier haci esey, ta busca un ruimte pa haci”. No obstante e hecho aki, cada instancia financiero ta insisti pa Aruba baha su gastonan. Pero Bermudez ta splica cu ta haci esaki, pa adverti pa gobierno no sigui aumenta su forza laboral. Algo cu e ta haya logico. Tin un personeelsstop y tin un VUT, y ni asina ta logrando di baha gastonan debi na e ‘automatismo’. Cu e loke a menciona, toch ta logra baha e cantidad di personal.