Cobra accijns den gasolin en bes di number di auto ainda un posibilidad

ORANJESTAD – E concepto di cobra accijns den gasolin en bes di impuesto riba number di auto t'ey ainda. Mientras cu e mandatario mester a pone e idea ey ‘on hold’, e no a ‘muri ainda’. Manera ta conoci, e mandatario tabatin intencion pa reemplasa e asunto di pagamento di number, cu e pagamento di accijns den gasolin. Mas bo core, mas bo ta paga. Un asunto cu a wordo para abrubtamente na 2015, pasobra no a keda cla cu e ‘uitwerking’ di esaki na tempo pa introduci’e na 2016.

CAMBIO

Na october 2015, Bermudez a confirma pa e portal aki cu tabata definitivo cu pa 2016, lo no a conoce e cobransa di number di auto, via e sistema di pago di accijns. Bermudez, a bisa e portal aki e ora cu tabata trahando pa e keda cla pa introduccion pa 2017. E momento ey, manera ta conoci, Departamento di Impuesto a presenta e alternativa di pago di number di auto, den forma di un sticker, en bes di paga pa un plachi nobo.

SITUACION AWE

E concepto ta sigui segun Bermudez, pero tin algun ‘aspecto’ aden pa cierto categorianan di vehiculo cu ta uza cierto fuel cu mester wordo resolvi. “Keto bay nos ta trahando riba nan” Bermudez a sigura e portal aki. Esey ta e unico problema. Ora cu a puntra e mandatario si esaki por bira algo ainda pa 2018, e mandatario a contesta. “Yaa..wak, elo ta un tremendo alivio pa belasting dienst si bo por e ora ey cancela henter e motorrijtuigen belasting, si bo por cobr’e den accijns” Bermudez a bisa. Ora cu a puntra e mandatario si e ta bira e ora un of e otro, esta sea accijns of plachi di number, e mandatario a bisa cu ta sea un of e otro. Y aworaki ta mustra cu pa 2018, lo bin cu e plachi nobo. Mester bisa sinembargo cu aunke recientemente e mandatario a sigura e portal aki cu pa 2018 lo introduci un plachi nobo diferente, e portal aki a compronde cu toch esaki lo no por completamente mirando cu e preparacionnan no ta cla pa por introduci e cambio pa 2018. Pero esey lo mester keda presenta proximamente ainda.