Renaissance Marketplace ta celebra 'Koningsnacht' diaranson 26 di April

ORANJESTAD – Su Alteza Real Rey Willem Alexander ta celebra su aña cu e pueblo di Reino Hulandes riba tur 27 di april, un dia caminda den henter Hulanda y Caribe Hulandes ta reina alegria y fiesta. Pero su fecha natal na 2017 lo ta ainda mas special, pasobra e maximo monarca di Huis van Oranje, ta yega na su di 50 aña di edad. Preparativonan ta grandi y Renaissance Marketplace, bibando semper cu pueblo y su cultura, tambe ta forma parti di e gran celebracion. Diaranson 26 di april un y tur ta invita pa bay na e centro comercial na bahia di Oranjestad pa disfruta di un anochi yena di dushi cuminda, bon musica y ainda miho ambiente.

Renaissance Marketplace su ‘King’s Food Fest’ ta cuminsa for di 7’or di anochi y lo bay te cu 12’or di marduga. Manera e nomber mes ta bisa, lo tin ‘food’ y na e ocasion aki, particularmente e platonan mas tipico y delicioso di nos Madre Patria Hulanda. Pensa riba croket, frikandel, pero tambe riba stroopwafels y poffertjes. Hmmm…. delicioso!

Y pa move e pianan y kima e calorianan ey, e musica semper contagioso di Robert Jeandor y Su Solo Banda Show ta bay resona den Renaisance Marketplace. Su repertorio ta uno hopi gusta durante Carnaval y tambe henter aña. Tumba, merengue, salsa y mas; Robert Jeandor semper tin algo pa tur hende zwaai heup.

Naturalmente e chikitonan di cas nunca ta keda afo di un celebracion na Renaissance Marketplace y pa nan tambe lo tin entretenimento pret y sano. Obra di man, pintamento, dino jump y mas. No lubida di admira y cumpra un recuerdo of accesorio cerca nos artesanonan local cu tambe lo ta presente pa ofrece nan productonan.