Total di 24 atraco na Aruba den e prome 4 lunanan di aña

ORANJESTAD – Cu e ultimo atraco di diasabra anochi (Palm Beach), e cantidad di atraco pa e luna aki ta yega na 3, di cual tur tres a tuma lugar den un siman di tempo, y esun di 24 pa e aña aki cu ta haci’e un ‘promedio’ di 6 atraco pa luna. Y ainda falta 7 dia pa e luna aki termina. Luna pasa tambe (maart) a tuma lugar 6 atraco di cual dos tabata riba un dia, y 5 tabata den un siman di tempo. Un situacion alarmante sigur cu tin Aruba den un tension unda cu bay. Loke tambe ta alarmante ,ta e hecho cu practicamente tur e atraconan aki, ta atraconan arma. Esey ta nifica cu tin hopi arma den circulacion, y cu hende no tin miedo pa usa arma. Mes momento, mester bisa cu polis a saca un raport awe diadomingo relatando cuanto detencion a cay te awor (37) e aña aki so, di cual varios ta relaciona cu atraco. Ta bon pa ilustra cu e cantidad di atraco cu NoticiaCla.com ta menciona, ta esnan cu a keda oficialmente raporta pa polis na e portal aki. Cu dos luna sigui tin atraconan tras di otro, sigur no ta un señal positivo pa nos isla. Dia 6 di februari tabatin un atraco algun ora despues cu a tene un razzia grandi y detene varios persona. Esey tabata e atraco # 15 pa 2017. Di e tempo ey pa awor, nos tin 9 atraco acerca e ultimo dos lunanan aki. E parti positivo ta cu polis su forma di traha ta pone cu ta pone man riba hopi di e atracadornan aki. Sinembargo e ola di atraco, ta sembrando panico den comunidad. Los di gritonan politico pa mas seguridad, comunidad ta reaccionando basta agita riba rednan social, y no ta ria pa vocifera nan opinion skerpi riba e situacion cu tin. Lesa e relato di detencionan di polis AKI.