Polis di Bonaire ainda en busca di tripulante perdi di barco crucero

KRALENDIJK – Noticia a plama internacionalmente cu un dama di un barco crusero ta perdi na Bonaire. Entretanto mas cu 48 ora a pasa cu e dama di nacionalidad Mexicano a baha for di e barco crusero Navigator of the Seas y cu no sa unda e ta. Informacion cu polis ta dispone di dje ta cu diahuebs ultimo despues cu e dama a baha for di e barco e tabata na pia den area di Kralendijk. Manera ya KPCN a informa den un boletin anterior na momento cu el a baha for di e barco crusero e tabatin bisti un blusa manga aden colo preto, un short di jeans y zapato colo preto. E tin cabey preto largo i postura delega. E nomber di e dama ta Adriana Morales de Florencio, nace na Mexico riba 4 di juni 1993.

Polis a haci un yamada urgente na cualke persona cu sa algo di e dama aki of cu por a mir’e pa por fabor tuma contacto cu polis na number di telefon 717-8000/ 715-8000 of na e number di tip anonimo di polis cu ta 717-7251.

Un di e fotonan hunto cu e raportahe aki, ta di e dama na momento cu el a baha for di e barco crusero ayera I e otro foto ta uno di su cara. Instancianan internacional manera di bapor mes a inicia nan campaña cu intencion di hala atencion di comunidad internacional riba e situacion aki cu a surgi cu e dama desapareci.