Situacion motociclista accidenta awe marduga ta sigui hopi critico

ORANJESTAD – E situacion di e motociclista E.R. (29) ta sigui hopi critico. Manera ta conoci awe (diasabra madruga) pa 04:32 Central di Polis a haya yamada di un accidente di brommer cu a caba tuma lugar riba e caminda di Shaba na altura di Compleho Frans Figaroa. Patruya di polis di Noord a presenta di biaha na e sitio unda a pidi pa ambulance cu urgencia mirando cu e situacion di e chauffeur di e brommer tabata mustra hopi grave door cu ela practicamente perde un banda di su braza y tabata sangra hopi. Na yegada di ambulance a stabilis'e y hib'e inmediatamente hospital. Specialista di trafico a presenta pa asina haci su investigacion kico por a sosode.

SITUACION DI MOTOCICILISTA

Segun vocero suplente di polis Liliana Rasmijn a splica NoticiaCla.com, te ainda loke por a compronde cu e chauffeur di e brommer mfa-1167 bayendo direccion noord pa un of otro motibo a perde control y a dal den un palo di luz. Su situacion te cu awo ta hopi critico. E chauffeur a perde su braza banda drechi. Tambe tur dos su pianan ta kibra y tin hopi sla paden. Keda pendiente pa mas informacion.