Carta na caminda pa esnan cu ainda no a paga number di auto

ORANJESTAD – E luna aki ainda ta sali un carta di aviso pa esnan cu no a cumpli cu pago di number di auto. Minister di finanza Angel Bermudez a confirma esaki na NoticiaCla.com. E incumplimento di hende cu ta pagando number di auto ta menos cu prome, y esaki ta nifica tambe cu tin mas entrada ariba e tereno aki. Esey no ta kita afo cu tin un incumplimento pa cual hendenan lo wordo ‘atendi cu ne’.

DI MOTORRIJTUIGBELASTING PA AANSLAGBELASING

Manera ta conoci, e ley a keda adapta aña pasa cu ta nifica cu e motorrijtuigbelasting a bira un aanslagbelasting. Esey kier men cu ora cu un periodo pasa cu un persona no a cumpli, e ta haya un naheffingsaanslag cu ta nifica cu e ta haya un aanslag pa e paga. “Si e tin placa pa haya bek di otro belasting, esey lo wordo compensa cu ne ora cu esey tuma lugar” minister di finanza Angel Bermudez a bisa.

INCUMPLIMENTO MENOS Y MAS ENTRADA

E incumplimento ta menos cu añanan anterior y esey ta refleha tambe den e aumento di entrada di belasting. Pero ta keda un grupo cu no ta cumpliendo den varios categoria. Nan lo wordo atendi cu nan. Y mirando cu awor belastingdienst por actua a base di e cambio di ley, ta mucho mas efficiente cu den pasado. E mandatario no ta na altura di con largo e lista ey ta di hende cu no ta cumpli mirando cu ta trabou di belastingdienst. Pero importante ta cu tin e grupo aki na bista y lo saca un aviso pa asina urgi nan pa bin paga. Si no duna oido na e aviso belastingdienst lo saca e cobransa/naheffingsaanslag manera menciona pa esnan cu no cumpli cu e pago corespondiente.