Chines cu a asesina director Serlimar castiga na 10 aña prizon

ORANJESTAD – E dama Chines cu a asesina director Serlimar a ser castiga na 10 aña prizon awe mainta. Exactamente e cantidad cu fiscal a pidi p'e dos siman pasa durante tratamento di e caso. Den su presentacion hues a mustra cu homicidio a keda comproba. Ela intencionalmente tuma bida di Fingal. Pa loke ta e parti di menasa cu morto, tambe a keda preuba segun hues. Abogado a hiba defensa di noodweer/noodweerexces, pero Corte ta rechasa esey. Sospechoso ta castigabel, segun Hues. Sospechoso a haci su mes culpabel na homicidio door di hinca victima varios biaha den pecho, hinc'e mas biaha y dal e cu martiu. Hues no ta exclui cu e victima a gara tene e sospechoso cu intencion sexual. Pero ela reacciona desproporcional y sin hustificacion. “ Homicidio ta un di e crimennan mas pisa cu tin. E bida ta e bien mas precioso di e ser humano” e hues a bisa.

E CASO

Manera por corda, den caso di asesinato di director di Serlimar, a pidi 10 aña pa e muher Chines sospechoso di a mata e persona. Awe den oranan di mainta te den oranan laat di atardi, den Corte di Husticia di Aruba a trata e lamentabel caso di morto hororoso di R.Fingal cu tabata director di Serlimar. Durante tratamento di e caso, e sospechoso muher Chines M.T. tabata para riba cu ta e victima Fingal lo a atac'e di un forma manera cu e kier a abusa di dje, y esey a pone cu ela actua den defensa propio. E muher Chines awe a splica den Corte den detayes tur e lucha formal cu a tuma lugar den e beauty salon cu a keda tur na sanger cu consecuencia morto di R.Fingal. Segun e muher, diferente biaha e mester a lucha cu R.Fingal caminda nan dos tabatin un cuchiu teni. Tambe e ta papia di lo tabatin un martiu teni y cu ela logra kita e martiu y dal R.Fingal cu esaki riba cabes. Tambe ela bisa cu R.Fingal a bula riba dje mientras cu e tabatin e cuchiu teni y R.Fingal a herida su mes hopi grave na su pecho.

VERSION DI FISCAL

Fiscal a bisa Hues cu e no ta kere e storia di defensa propio. Ela bisa cu segun ley, pa hustifica defensa propio, mester tin violencia y e ta haya cu loke e victima a haci tabata mas bien brasa y caricia e sospechoso Chines. Esey ta haci cu no por papia di defensa propio. El a condena e forma hororoso con e Chines M.T. a hinca mas cu 23 biaha e victima cu cuchiu. Tambe Fiscal a mustra cu na februari 2017, e sospechoso a menaza un preso muher den KIA cu e lo mat’e y a bay riba dje cu un shovel. Fiscal ta considera M.T. un persona di sanger frieu. El a mustra cu M.T. a kita tata di un famia for di un famia. Tur esaki a pone Fiscal exigi 10 aña di prizon.