Bermudez: Ta 'evaluando' introduccion transaction tax

ORANJESTAD - Gobierno no ta bay introduci un transaction tax di 1% na Aruba. Por lo menos no e cantidad di 1% y no e aña aki ainda. Minister di Finanzas Angel Bermudez den un entrevista a splica NoticiaCla.com diaranson atardi cu ta ‘evaluando’ e posibilidad pa bin cu un tipo di impuesto asina, pero di entre 0.1 pa 0.5 % y no 1%. Y ademas, no a dicidi mes cu ta bay hacie ainda sino mas bien e tin cu wordo studia ainda. Minister Bermudez no sa unda e informacion a bin y no por confirma cu ta di e declaracion di minister Eman pasobra e no a wak e of lesa e declaracion ey.

E mandatario a splica cu conseho di minister a bin cu e idea pa bin cu e asina yama ‘financial transfer levy’ cu ta placa cu ta wordo genera entre e trafico bancario den un pais. E ta un forma pa genera fondo pa por yuda sera e buraco di e deficit di gobierno segun Bermudez. Mirando cu a calcula cu e volumen di trafico financiero di banconan na Aruba pa aña ta 50 biyon, si introduci e impuesto aki, por genera por lo menos 50 miyon florin pa aña extra cu e impuesto aki.

Ta awor a instala un comision cu tin cu bay analisa e efecto di e tax aki den otro paisnan den region, analisa e desventaha y bentaha, check e aspecto macro y micro economico y tambe e parti financiero y fiscal. “Ainda tin cu bay determina ken ta cobr’e, y con ta cobr’e” Bermudez a sigui bisa. Ademas tin cu reuni cu Banco Central, banconan comercial y conceptual esaki den un concepto di ley prome cu por cuminsa cobra e impuesto aki ainda. “Pues nos tin cu laga e cabay aki mara ainda” Bermudez a sigui bisa.

E ta compronde e precupacion cu tin entre otro den sector bancario, y tambe den comunidad, aunke cu no tin nada concreto ainda. “Semper ora bo ta papia di impuesto, hendenan ta teme pa e dolor cu nan ta bay sufri, y no cu nan a sintie ainda. E idea so cu nan por sufri dolor, ta pone nan teme pa e dolor ey” Bermudez a bisa. Ya caba ta wordo papia di 1%, siendo cu ta papia di promilage enves di porcentahe. “Nos no tin ningun detaye completo ainda. Ta awor e conseho ta wordo busca y traha y treci pa conseho di minister. E ora por bay den un dialogo cu ken cu ta riba e tema aki” Bermudez a finalisa bisando.