Stichting Musica a cumpli cu debe atrasa na musiconan

ORANJESTAD - Cu hopi positivismo y orguyosamente Stichting MUSICA a anuncia awe mianta cu nan “Financial Report 2017” di Aruba Caiso & Soca Monarch ta cla y siman pasa a presenta esaki na musiconan. Ta un momento sumamente importante pa Stichting MUSICA, e fundacion cu oficialmente ta organisa Aruba Caiso & Soca Monarch, mirando cu ta resulta cu e stichting a logra cumpli cu nan debe atrasa na musiconan di 3 aña pasa te cu 2017. Stichting MUSICA a bisa tambe cu lo sigui traha den forma profesional y cu un reto nobo pa engrandece e festival pa 2018.

GRADICIMENTO 

Stichting MUSICA a gradici tur musico pa nan pasenshi y e confiansa cu nan a deposita den e board nobo di Stichting MUSICA. E stichting a traha duro, no obstante tur contratempo y momentonan dificil, cu e actitud y e meta pa keda positivo y asina a logra pone un festival riba pia cu a kibra tur record di participacion cu 101 composicion y cu excelente resultado. Nos por corda cu e aña aki, Stichting MUSICA a logra reparti tur premio y a paga tur musico pa nan participacion, prome cu e dushi temporada di Carnaval a termina. Stichting MUSICA a implementa e iniciativa aki pa duna balor na e musiconan y esaki sigur ta un otro muestra positivo y profesional di e direccion nobo di Stichting MUSICA.

CALENDARIO NOBO

Stichting MUSICA ta trahando riba un calendario nobo pa continua aña 2017 y esaki lo wordo presenta otro luna durante nan proximo reunion riba dia 13 di mei 2017. E board y directiva di Stichting Musica ta confirma cu transparencia y positivismo lo sigui prevalece durante e temporada venidero y por ultimo ta gradici tur esnan cu di un forma of otro a “go the extra mile” pa haci e festival un exito rotundo.