Caso ‘Maximus’ mester divulga ken a paga pa mata Wiels

WILLEMSTAD – E proceso contra Burney “Nini” Fonseca, considera como e ‘link’ entre esnan cu a ordena e morto contra Helmin Wiels (dfm) y esnan cu a ehecuta e morto di e politico na mei di 2013, a sigui awe mainta. E intencion tabata pa exclusivamente trata e tarea di Fonseca den e caso aki. Tur atencion ta riba e caso aki na Corsou y otro partinan di Reino Hulandes. Pa e caso aki a traslada e asesino di Wiels,- Elvis ‘Monster’ Kuwas pa Bonaire den weekend y awe mainta trece cu helicopter pa Corsou pa ta testigo.

E CASO

E caso di awe mester saca afo ken ta esnan cu a duna orden pa asesina Wiels, y ken a haci e pago. Fonseca lo mester a ricibi e suma di placa, y lo tabata e link. A compronde cu awe (y diabierna), lo mester bin confesionan interesante cu por trece un claridad riba e caso aki. ‘Monster’ a declara awe mainta caba cu e ta cla pa ‘basha abou’ y no kier tene e famianan di Wiels mas na pena. Pero den corte awe mainta caba tabatin discusion entre esnan cu ta acusa. Varios nomber a cuminsa cay caba, di cual esun mas cu a keda menciona, ta ex minister George Jamaalodin cu lo ta e persona cu mester a paga pa mata Wiels. Jamaalodin mes ta na Caracas cera ainda, pendiente pa wordo traslada pa Corsou. Pa loke ta Kuwas, e tin un sentencia caba di 30 aña, cu e ta sintando den un prison na Hulanda.

TESTIGONAN

Fuera di Kuwas, lo tende mas testigo y presenta material como prueba, segun e fiscal di husticia Guiliano Schoop. “Tur loke a keda produci di lunanan di investigacion, lo keda presenta awe na hues” Schoop a bisa. Ta spera cu awe mes e caso por conclui y pa despues awe tardi por anuncia e castigo cu kier pidi pa esnan culpabel den e caso. Keda pendiente pa desaroyo di e caso aki. Fuente, Yves Cooper, Extra, Caribisch Netwerk. Fotonan di corte ta di Yves Cooper. Foto di Nini Fonseca ta di Extra.