Gobierno awor a pone fecha di ultimatum pa MIO cumpli

ORANJESTAD – Si luna pasa ainda gobierno no tabata kier a pone un fecha pa e compania di telecomuncacion MIO cumpli cu debenan atrasa, awor gobierno a duna e compania di telecomunicacion te fin di juni pa cumpli cu nan pago, sino ta ‘pull the plug’. Asina e mandatario di telecomunicacion Richard Arends a confirma awe mainta na NoticiaCla.com. “Mi echt ta spera cu nos no mester yega asina leu" e mandatario a sigui bisa. Segun e mandatario, a duna e compania te 1 di juli pa cumpli, y ta wardando riba nan contesta. Pasenshi ta cabando, pero ta spera atrobe, cu e no tin cu yega asina leu. Cu ‘pull the plug’, kiermen cu gobierno lo revoca e licencia di operacion si pa e fecha ey, no cumpli cu e pagonan necesario. Ta papia di un suma di por lo menos 14 miyon florin cu ta dos aña di licencia.   E compania di telecomunicacion MIO Wireless na Aruba por perde su licencia proximamente y stop di existi.

RETRASO DI DOS AÑA

Manera raporta anteriormente, e portal aki a compronde mientrastanto cu e compania en cuestion tin un retraso di 2 aña di pago di nan concesion, y esey ta traduci na 14 miyon florin cu nan debe gobierno. “No ta un secreto. Tin hopi aña procediendo entre land Aruba (gobierno) y MIO pa loke ta trata un disputa cu tin den feesnan, cu e compania di celular debe” Arends a confirma pa e portal aki, luna pasa.

PRO LEVEL PLAYING FIELD

E mandatario a splica cu e ta pro un level playing field, esta cu tur partido ta competi riba e mesun nivel cu e mesun reglanan aplica. E sumanan pa concesion di celular ta fiho manera stipula pa ley. “Irespectivamente di con grandi un empresa ta, e sa kico ta e feesnan cu mester paga” Arends a bisa. A duna MIO e ultimo ‘advertencia’, kico e suma ta cu ta habri. “Obviamente e paso siguiente ta pa intrekking di e concesion” Arends a sigui bisa. Mientras cu ta sperando un contesta, gobierno a cuminsa ‘encamina’ e proceso pa revoca e licencia di e compania.

DEADLINE

Luna pasa e mandatario no kier a bisa exactamente pa cua fecha e tabatin pensa di pull e licencia, pero tin cu tene cuenta cu tin dos otro proveedor cu si ta pagando y cumpliendo y e mandatario mester garantisa un ‘level playing field’ pa tur hende. E mandatario no por a confirma cu ta e otro dos companianan ta pushando pa e di tres operador cumpli. “Mi no por comenta riba esaki. Pero pa loke ta trata unfair competition riba su mes, si ta algo cu tin mi atencion” Arends a sigui bisa biaha pasa.