Asesino Helmin Wiels posiblemente presente den caso Maximus na Corsou

WILLEMSTAD – E asesino di Helmin Wiels Elvis ‘Monster’ Kuwas a yega Bonaire den fin di siman, y lo mester presenta den corte diaranson durante tratamento di e caso Maximus. Por lo menos esey ta e informacionnan cu ta circula. Mientras cu autoridad tin un silencio hermetico riba e traslado di Kuwas for di Hulanda, informacion cu NoticiaCla.com tin, ta cu esaki ta e motibo di su ‘bishita’. Kuwas a bin bon cuida, completo cu cuminda for di Hulanda pa asina no tin cu haya nada di Bonaire. Tur ta medidanan di seguridad cu a tuma pa evita cualkier problema. Y ora cu ta necesario, lo traslad'e temporalmente pa Corsou.

CASO MAXIMUS

E caso Maximus ta bay riba esnan cu lo ta involucra den e asesinato di Wiels, pero mas bien esnan cu a orchestra henter e asesinato y tambe ordena esaki. Un di esnan cu lo wordo scucha ta Burney ‘Nini’ Fonseca cu lo ta intermediario entre esnan cu a tira Wiels mata y esnan cu a duna e orden pa e asesinato. E caso ta cuminsa diaranson (mayan) y tambe diabierna, pues dos dia. Seguridad rond di e caso aki ta grandi mirando e embergadura cu e tin pa soluciona e caso. Foto cortesia Noticia 13 di Tv Direct.