BCA: Estado di economia Aruba gran parti di 2016 no positivo

ORANJESTAD – E actividad economico na Aruba pa e prome lunanan di 2016 no tabata mucho positivo. Esaki e rapport recien publica awe di Banco Central di e ‘Estado di Economia” di Aruba ta raporta. Segun e rapport di e instituto financiero, ‘e actividadnan economico a disminui den e prome nuebe lunanan di 2016. Un caida den ambos ingreso turistico y consumo domestico a contribui na e desaroyo aki’.

CAIDA INGRESO TURISTICO

Ingreso turistico, manera registra den e balansa di pago, a baha cu 0,4 porciento, contrario na un subida di 3,9 porciento den e mesun periodo di 2015. Esaki por ta relata na e cambio den e trend exuberante di e mercado Venezolano cu tabata evidente durante e ultimo cinco añanan.

RETRASO REHABILITACION REFINERIA

A pesar di e proyectonan vigente, manera e expansion di Dr. Horacio E. Oduber hospital y e ‘Green Corridor’, inversionnan no a realmente logra impulsa actividadnan economico manera anticipa debi na e retraso den e trabounan di rehabilitacion na e refineria.

CAIDA ENTRADA BBO

Indicadornan di consumo te cu e di tres trimester tambe a mustra un variedad di señalnan, pero en general consumo a sigui mengua. Notabel ta cu entradanan for di BBO a registra un caida durante e prome nuebe lunanan, y credito na consumidor a sigui baha.

TASA DI CAMBIO REAL A BAHA FUERTEMENTE

Como resultado di un caida den e prijsnan di energia y e desaroyo den prijsnan modera di cuminda, e inflacion a baha durante e prome tres trimester di 2016. E tasa di cambio real di Aruba compara cu Merca a baha fuertemente cu 1,8 punto di porcentahe den e tercer trimester di 2016, compara cu e di cuater trimester di 2015, mehorando asina Aruba su posicion competitivo contra esun di Merca.