BCA: Entrada y gastonan di gobierno a aumenta na 2016

ORANJESTAD - Entrada di gobierno a subi cu 2,8 porciento durante e prome nuebe lunanan di 2016, impulsa pa entrada mas halto di impuesto riba ganashi y tereno. Asina e raportahe di Banco Central emiti awe riba e estado di economia riba e prome 9 lunanan di aña pasa ta bisa. Pero e gastonan tambe a subi. “E gastonan di gobierno a subi cu 1,4 porciento, pa gran parti debi na pagonan mas halto di interes y e subsidio di gobierno na AZV. E debe di gobierno na fin di september 2016 a crece te na Afl. 4.172,1 miyon, of 87,3 porciento di e PBD di Aruba”. E ta cuadra cu e raportahe di e di tres cuartal di 2016 di e instituto financiero. 

EXPANSION PLACA DEN CIRCULACION

E cantidad di placa den circulacion a expande cu 6,3 porciento durante e prome nuebe lunanan di 2016. Un aumento den entrada di divisa (+Afl. 269,4 miyon) a mas cu compensa pa e Afl. 29,6 miyon caida den e activo domestico neto. E entrada den divisa, cual ta mas abou cu e periodo corespondiente na 2015, a origina principalmente for di ingreso di turismo y fiansanan di gobierno for di exterior.

CRECEMENTO SIGNIFICATIVO DEN RESERVA OFICIAL

Tanto e cuenta coriente como e cuenta di capital y di finanza di balansa di pago a registra surplusnan, resultando den un crecemento significante den e reserva oficial. Consecuentemente, e tasa di cobertura di importacion a yega 6,0 luna di e total di pagonan den cuenta coriente na fin di september 2016.

Pa resumi, e actividadnan economico domestico ta parce di a mengua den e prome nuebe lunanan di 2016. Actividadnan for di turismo, e motor principal di crecemento economico, a cay inesperadamente mientras cu e consumidornan local a keda cauteloso den nan gastonan.