Banconan local contra introduccion ‘transaction tax’

ORANJESTAD – Banconan na Aruba no ta contento cu e idea di gobierno pa bin cu un asina yama ‘ transaction tax’, ya cu e lo tin un efecto negativo riba actividadnan bancario. Un ehecutivo halto papiando cu NoticiaCla.com solamente como ‘fuente bancario’ a splica kico e precupacion ta. Segun e fuente bancario aki, ‘ banconan no ta kere cu esaki lo ta beneficioso pa economia di Aruba. Esaki pasobra ‘e lo crea un cash economy un bank run riba deposits’. E lo limita e prestamo cual lo impacta crecemento y/of stimula economia di Aruba. Como tal, banconan no ta pro pa e introduccion di e ley aki. Mas informacion e fuente no por a duna e momento aki.

Den un articulo adhunto, NoticiaCla.com a presenta algun comentario publico di comunidad, cu tampoco ta contento cu e asunto aki y cu no a sconde nan malcontento. Y manera cu e fuente bancario a bisa, hendenan no ta bay pone placa na banco mas pero lo funcion a base di ‘cash’ solamente cu ta perhudica banconan.

Comerciantenan no a sconde nan critica riba e asunto aki, na NoticiaCla.com. Conocido comerciante y ex presidente di Aruba Trade and Industry Association (ATIA) Stephen Daal a comenta esaki riba su pagina di Facebook tambe. “ Ni maske cuanto comercio grita of sclama pa yuda hasi cu gobierno nan compronde cu hisamento di entrada y no baha gasto no ta e forma pa drecha ni negoshi. Corda un pais!” Daal ta cuminsa cu su comentario. E ta mustra tambe cu ta duel e di lesa esaki den corant y cu enves di gobierno ta uza e metodo aki pa elimina tur otro belasting cu ta existi, e ta djis pone esaki acerca como si fuera e cartera nan di nos pueblo ta pata pata di placa. “ Increibel y tristo ta un decision asina!!!” Daal ta sigui bisa.

Y manera e critica den e articulo adhunto ta bisa, hende tin problema tambe cu e destinacion di e impuesto aki. “Anto mas ainda ta bisa acerca ta pa crea fondo pa por financia pa e hospital y e proyecto di Green corridor; maske cu mi por ta sostenedo di e proyectonan aki, no por ta asina cu ta bay saca mas placa for di saco di pueblo mientras cu gobierno su gasto nan si ta sigui biento en popa”. Segun Daal, tur hende cu ta sigui tur loke ta pasa den gobierno sa cu e gasto mas halto ta esunnan di personal esta cu pa cada florin cu gobierno cobra 0.75 ta bay na personal. “ Aki e asunto ta primi y tanten cu niun gobierno no atende cu e asunto aki lo nan keda hisa entrada di tur cos cu yen di pretexto!!!” Daal ta sigui bisa.

Daal ta sigui clarifica algun di su puntonan. “AZV ley ta bisa cu si tin deficit ta gobierno mester asumi esaki. Awe ta un BBO di 1% extra.

SERLIMAR ta un obligacion di gobierno cu pronto nos lo paga pe!! Pero baha gasto ay dios min sa kico esey kiermen mas?” Daal ta sigui comenta. Segun Daal, ta un abuso di marca major pa pueblo financia e aparato gubernamental, enves cu nos politico nan asumi nan responsabilidad debido di hasi cu e aparato ta eficiente y hasi cu nos finanzas ta sostenibel. “Pesey Hulanda mester bin? Ta con anto??” Daal ta finalisa bisando. Pues diahuebs ABA lo bin cu un reaccion y comunicado despues cu nan reuni internamente riba e asunto aki.